English Lover
07-06-2008, 05:07 PM
في تلك الليلة خرجت من المسجد بعد صلاة العشاء
ودخلت البيت وانا في غاية الارهاق والتعب بعد يوم طويل وشاق
وكنت انتظر يخلص العشى واحط راسي وانام
وعشان مايجيني النوم جلست قدام التلفزيون وصبيت كاسه من ابريق الشاهي عشان ينشطني شوي
وشوف في التلفزيون تقرير في احد القنوات عن التعليم في احد الدول
واتفرج شوي وتجيني نعسه واصحى وارجع انعس ..... حتى حطيت راسي على المركة وغفوت في نوماً عمييييق
........ خ خ خ خ خ ....
.... خ خ خ خ ....
(( واتحلم اني في مدرستي ))
والمدير في اول السيب واول ماشافني وهو يجيني ركض ..... (( قلت الله يعين الارض ))
وجاء ومعه ورقة بيده مدها لي وقال :
يااستاذ انقلش لفر تفضل هذا ورقة نقل .....
قلت بيني وبين نفسي : اثرك يوم تركض كله من الفرحه
.. اخذت الورقة واقرأ اسم المدرسة اسم اول مرة يمر علي ..
قلت : لحظة قبل تروح ياسعادة المدير ..... ((عارف ان فيها نقل صار عاقل ))
قال : نعم
قلت وش اسم المدرسة
قال : مدرسة صاصا بلا غلاصا
قلت : صادق انت
قال : ايه ... لا وماسألتني وين مكانها
قلت : وين
قال : في جزر الواق واق
قلت : متاكد
قال : نعم
قلت : طيب .. البارحة انت نايم تحت السرير
قال : لا وليش تسأل هالسؤال
قلت : يمكن اول ماصحيت خبطت براسك في شئ والا شئ ..
قال: منقول ودمك خفيف .. ترا بكرة لازم تباشر بالمدرسة الجديدة
قلت : لحظة وشولون اروح لجزر الواق واق
قال : تدل طريق البحر روح للميناء وشوف البواخر وهناك اسأل
قلت : من متى وحنا عندنا بحر
قال : من يوم نقلوك ... وقعد يضحك هاهاها
قلت : مشكور واستر ماواجهت وسامحنا في القصور
قال : ابدا ماواجهت الا خير
واطلع اركب سيارتي وعلى الميناء
واول باخرة القاها وفيه واحد واقف على حافة سفينته وينادي :
مكة مكة ... جدة جدة .... حايل حايل .... الدوادمي الدوادمي
جيته وقلت له : اللحين ماخليت ديره الا وناديت بها كلها تروح لها
قال : وش دخلك
قلت : .. طـــــــَََــــــيب ... عندي سؤال ..توديني جزر الواق واق
قال : هذي يالحبيب بعيدة شوي ولازم توقف في جزيرة ثانية وتكمل في باخرة ثانية بعد
قلت : اكمل صحرى مافيه طريق مزفلت الين الديرة نفسها
قال: يالحبيب .. حنا في بحر ونوصلك بالسفن ماانت في البر وراكب ددسن تفحط بالطعوس
قلت : ايه صح
قال : السعر غالي ترا
قلت : خلاص وان شاء الله انك منت مغليها واجد
... وركبت السفينه وعشق على الاول ودز ..قصدي نزل الشراع وابحرت السفينه
واول ماوصلت جزيرة الواق واق تفاجأت انها جزيرة جميلة ومليئة بكل الخدمات
وحجزت في فندق فخم ورائع جدا ً
ومن بكرة طلعت الساعة 6 الصبح ورحت للمدرسة
وش مدرسة ياهي شئ مايتصور
مبنى واسع ورائع صحيح الاسم ماينصرف بس المنظر يعوض
وادخل غرفة المدير ويستقبلني وكان شخص خلوق جدا
واول مااخذ ورقة النقل وقرأ بياناتي تفاجأ وقال :
معلم وعلى المستوى الثاني
قلت : وان شاء الله دفعتي على وشك يجيها تحسين السنه هذي
قال: عزيزي المعلم انت في جزر الواق واق والتي تمنحك المستوى الخامس وهذا من حقك
قلت : ياحبي للمدير خفيف الدم
قال : بكرة ارفع للوزارة اوراقك وبياناتك وتصير على المستوى الخامس
قلت :ياسلام عليك يا واصل . تستعرض عندي عشاني جديد هاه .... اصبر علي تطلع علومك . بس ياحليلك تسوي انك على اتصال مباشر بالوزير . دور سالفة يمكن تنتصدق اما على طول تحسن مستوى . ياانك احسن مدير نكوتي مر علي
قال: الحقيقة مدري وش تقول بس لا تشيل هم حول هالموضوع
قلت : شكلك حالف يمين مع واحد من اخوياك لازم تمشيها علي بس ابا اسوي نفسي يعني ماادقق ماعليك
قال: وش رايك يااستاذ انقلش لفر ناخذ جولة تعريفية حول المدرسة
ورحنا وشفتنا الفصول مرتبة ووسائل معلقة و عدد الطلاب مايزيد على 25 طالب والفصل واسع ويشرح الصدر
وبعدها تفرجنا في غرفة المدرسين وكل واحد له طاولة .... تذكرت ثلاثة من زملائي كنا متزاحمين على طاولة و كل واحد له درج
وجدت ان المدرسة مجهزة للتعليم بالكامل ولا ينقصها أي شئ
في اليوم الثاني اخذت جدولي وبدأت ادخل الحصص
انبهرت بمستوى الطلاب وحبهم وشغفهم في التركيز بالدرس وتسابقهم لحل التمارين
ومااحد يتذمر من الواجبات لانهم يعرفون ان الواجب ترسيخ للمعلومة وهذا هو اكبر اهتمام لهم
قلت بنفسي : ياحليلكم يالواق واقيين انتم وطلابكم ويازين التدريس بمدارسكم اللي توسع الصدر وتشجع على الابداع
في حصة فراغ رحت لغرفة المدرسين
ماشاء الله المدرسين دايما ً اذا تكلمون يتكلمون في المادة العلمية اللي هم يدرسونه او ثقافة عامة
قلت في نفسي (( ماتلاحظون اني صاير اكلم نفسي واجد !!)) :
الله يرحم حال ابو فلان اللي ماخلا غيبة والا نميمة في زميلة بالتخصص الا وقطع فيه وحشه حش مابعده ولا قبله
في اليوم اللي بعده جاء للمدرسة مشرف تخصص انجليزي
واول ماشفته في الطابور ويجيني غثيان قلت مالي غير اجاريه كالعادة اول مايبدأ واكيد ماراح يمدح
في الحصة الثانيه دخل عندي في الفصل وشرحت الدرس والطلاب الواق واقيين اللي متربين على حب العلم اعجبوني وأبدعوا مع في المشاركة والتمارين
بعد الحصة في حصة فراغ جلست مع المشرف قلت في نفسي : اتوقع يغطي على مشرفي الاول اللي قال ليش ماتغطي قلم السبورة اذا وقفت الكتابة...
بس هذا يمكن يقول ليش ماتحط القلم علي السبورة بدل ماتشيله في يدك طول الحصة
بس انصدمت اول ماقال :
اشكرك عزيزي وزميلي المعلم كان الدرس اكثر من رائع . .... واستلم مدح
ومدح ومدح الين قلت له : وش رايك نعيد الدرس ....... (( الاخ مهوب متعود على المديح هههههه ))
وكلمني عن طرق التدريس واي الطرق كانت طريقتي بالفصل وبصراحة طلع مشرف مثقف وفاهم في طرق التدريس وافادني كثيرا ً
وبالاخير سأل عن التحضير والخطة وتكلمنا فيها شوي ثم قال : بعض النقاط اللي ذكرتها لك خذها في بالك الى ان ازورك المرة الثانية
قلت : ابشر وتامر امر
راح المشرف وجاء المدير وطلبني لسالفة عنده شوي
قلت : افا بدت الغيرة يبي اللحين يحط في من العيوب عشان مااشوف نفسي من كلام المشرف
وبعد ماجلست عنده بالمكتب قال :
ابشرك جاء من الوزارة اليوم قرار تحسين مستواك من الثاني الى الخامس اللي تستحقه
وعطاني نسخه من القرار وانا ماني مصدق
وفجأة واصيح واطامر ... (( اطامر يعني اقفز وانقز فرحة ً وسرورا ً .... خلاص يالمعجم المحيط على غفلة ))
واسلم على المدير قلت له ماقصرت وبيض الله وجهك
قال : وش فيك متعجب ومنت متوقع هالتحسين
قلت : هذا حلم بالنسبة لي ماهوب معقوله بالسرعه ذي
قال : بالعكس روح الان اسأل أي مدرس من زملائك وستجد انه على المستوى الخامس اول ماتعين عندنا
((قلت في نفسي : الظاهر عندهم مدرسين متفقين من بعض ويطالبون بحقوقهم الين يجيبونها ))
وتمر الايام علي في هذي المدرسة من احلا ايام العمر ولاول مرة ماكنت احسب كم باقي اسبوع وتجي العطلة
وفي الفصل الدراسي الثاني قالوا ان الوزير يبي يزور المدرسة
وفي هذا اليوم كنت اقول ياحظ الواق واقيين في هذا الوزير وياحظهم في وزارتهم
وفي الصباح بالطابور دخل الوزير من بوابة الساحة وصار يستمع لاذاعة الصباح وكانت الاذاعة ترحب به وبقدومه
وهو يقف ومعه مرافقيه من الوزارة
وانا اخوكم في الله اسرح في الخيال ...
((دايم مايجي العيد الا اذا سرحت ورحت بجو لحالي وانتم هاللحين كملوا القصة وراح تعرفون ))
وانا اتذكر ايامي قبل انقل لهذي المدرسة وايامي فيها
واتذكر اني تو شعرت بالتدريس وكيف نسيته قبل
وبدون شعور صرت امشي من اول الساحه بسرعة تجاه الوزير على اني اسلم عليه واحبه على راسه تقدير لجهوده و تعبه لاجل الرقي بالتعليم في بلاده في جزر الواق واق
وصرت اسرع اكثر واكثر
حتى صرت اركض ركض
وطاح العقال ... ثم الشماغ ... وطاحت الطاقيه ............ (( قلت لكم ماعاد اشعر بالجاذبية الارضية ))
وانا اركض بالساحه متوجه يم الوزير
والطلاب والمدرسين صاروا يطالعون في وتركوا الاذاعة
وهم مستغربين وش هذا اللي يركض من اول الساحه وموجه يم الوزير وش يبي يسوي
والمرافقين للوزير صار بعضهم يقرب يمه للحماية وبعضهم توجه يمي يبي يردني
والوزير صابه شك ان عندي نية لاغتياله وخاف وصار يتراجع
وانا اركض اسرع من قبل وخلاص حطيت في راسي اني اسلم عليه يعني اسلم عليه ....
واتجاوز حرس الوزير وهذا اوخر عنه وهذا ادفه
واول ماقربت من الوزير ..
وهو يرمي بشته وينحاش برا المدرسة
وانا وراه في الشارع
والحراس والمرافقين ورانا
والمدير والمدرسين وراهم والطلاب معهم ............ (( مشهد سينمائي خخخخخخ
وهو يركض ويقول وش تبى نعطيك .. وش تبى نعطيك .. بس علمني
وانا وراه بدون شماغ ولا طاقيه والشعر كشه وطاير والشكل مرعب جدا ً مع هالكشه
واخر شئ انقز عليه ويطيح وقلت له :
انت احسن مدير قصدي احسن وزير بالعالم كله وابغى اسلم على راسك تقديرا ً واحتراما ً
قال وهو منفجع : .... بس .. هاك . وقرب راسه
عاد بهاللحظة التفت وراي واذا هالحراس قد قربوا يوصولون يمنا و يبون يمسكوني
وانا امسك راس الوزير واحبه بسرعه وبقوة كتعبير عن مشاعري
وياليتني ماحبيت راس الوزير
لاني صحت بااعلى صوت :
آآآآآآآآآآآآآآآآآآآآآآآآآآآآآآآآآآآآآآآآآآآآآ آآآآه
وقلت : ليش راسك حااااار ياسعادة الوزير
واصحى من حلمي
واثري كنت محتضن ابريق الشاهي اللي كان بجنبي قبل الحلم وحبيت الابريق وهو حار واحسبه راس الوزير
وكانت حرارة الابريق لها لسعه بالبرطم مايحتاج وصف .... جربوا وتعرفون ههههههههه
وقمت اغسل وجهي وجاء في بالي فكرة وقلت :
ليش مااقدم نقل السنه الجاية لجزر الواق واق اذا هي موجودة مايمنع !!!
والمعذرة على الاطالة
ودخلت البيت وانا في غاية الارهاق والتعب بعد يوم طويل وشاق
وكنت انتظر يخلص العشى واحط راسي وانام
وعشان مايجيني النوم جلست قدام التلفزيون وصبيت كاسه من ابريق الشاهي عشان ينشطني شوي
وشوف في التلفزيون تقرير في احد القنوات عن التعليم في احد الدول
واتفرج شوي وتجيني نعسه واصحى وارجع انعس ..... حتى حطيت راسي على المركة وغفوت في نوماً عمييييق
........ خ خ خ خ خ ....
.... خ خ خ خ ....
(( واتحلم اني في مدرستي ))
والمدير في اول السيب واول ماشافني وهو يجيني ركض ..... (( قلت الله يعين الارض ))
وجاء ومعه ورقة بيده مدها لي وقال :
يااستاذ انقلش لفر تفضل هذا ورقة نقل .....
قلت بيني وبين نفسي : اثرك يوم تركض كله من الفرحه
.. اخذت الورقة واقرأ اسم المدرسة اسم اول مرة يمر علي ..
قلت : لحظة قبل تروح ياسعادة المدير ..... ((عارف ان فيها نقل صار عاقل ))
قال : نعم
قلت وش اسم المدرسة
قال : مدرسة صاصا بلا غلاصا
قلت : صادق انت
قال : ايه ... لا وماسألتني وين مكانها
قلت : وين
قال : في جزر الواق واق
قلت : متاكد
قال : نعم
قلت : طيب .. البارحة انت نايم تحت السرير
قال : لا وليش تسأل هالسؤال
قلت : يمكن اول ماصحيت خبطت براسك في شئ والا شئ ..
قال: منقول ودمك خفيف .. ترا بكرة لازم تباشر بالمدرسة الجديدة
قلت : لحظة وشولون اروح لجزر الواق واق
قال : تدل طريق البحر روح للميناء وشوف البواخر وهناك اسأل
قلت : من متى وحنا عندنا بحر
قال : من يوم نقلوك ... وقعد يضحك هاهاها
قلت : مشكور واستر ماواجهت وسامحنا في القصور
قال : ابدا ماواجهت الا خير
واطلع اركب سيارتي وعلى الميناء
واول باخرة القاها وفيه واحد واقف على حافة سفينته وينادي :
مكة مكة ... جدة جدة .... حايل حايل .... الدوادمي الدوادمي
جيته وقلت له : اللحين ماخليت ديره الا وناديت بها كلها تروح لها
قال : وش دخلك
قلت : .. طـــــــَََــــــيب ... عندي سؤال ..توديني جزر الواق واق
قال : هذي يالحبيب بعيدة شوي ولازم توقف في جزيرة ثانية وتكمل في باخرة ثانية بعد
قلت : اكمل صحرى مافيه طريق مزفلت الين الديرة نفسها
قال: يالحبيب .. حنا في بحر ونوصلك بالسفن ماانت في البر وراكب ددسن تفحط بالطعوس
قلت : ايه صح
قال : السعر غالي ترا
قلت : خلاص وان شاء الله انك منت مغليها واجد
... وركبت السفينه وعشق على الاول ودز ..قصدي نزل الشراع وابحرت السفينه
واول ماوصلت جزيرة الواق واق تفاجأت انها جزيرة جميلة ومليئة بكل الخدمات
وحجزت في فندق فخم ورائع جدا ً
ومن بكرة طلعت الساعة 6 الصبح ورحت للمدرسة
وش مدرسة ياهي شئ مايتصور
مبنى واسع ورائع صحيح الاسم ماينصرف بس المنظر يعوض
وادخل غرفة المدير ويستقبلني وكان شخص خلوق جدا
واول مااخذ ورقة النقل وقرأ بياناتي تفاجأ وقال :
معلم وعلى المستوى الثاني
قلت : وان شاء الله دفعتي على وشك يجيها تحسين السنه هذي
قال: عزيزي المعلم انت في جزر الواق واق والتي تمنحك المستوى الخامس وهذا من حقك
قلت : ياحبي للمدير خفيف الدم
قال : بكرة ارفع للوزارة اوراقك وبياناتك وتصير على المستوى الخامس
قلت :ياسلام عليك يا واصل . تستعرض عندي عشاني جديد هاه .... اصبر علي تطلع علومك . بس ياحليلك تسوي انك على اتصال مباشر بالوزير . دور سالفة يمكن تنتصدق اما على طول تحسن مستوى . ياانك احسن مدير نكوتي مر علي
قال: الحقيقة مدري وش تقول بس لا تشيل هم حول هالموضوع
قلت : شكلك حالف يمين مع واحد من اخوياك لازم تمشيها علي بس ابا اسوي نفسي يعني ماادقق ماعليك
قال: وش رايك يااستاذ انقلش لفر ناخذ جولة تعريفية حول المدرسة
ورحنا وشفتنا الفصول مرتبة ووسائل معلقة و عدد الطلاب مايزيد على 25 طالب والفصل واسع ويشرح الصدر
وبعدها تفرجنا في غرفة المدرسين وكل واحد له طاولة .... تذكرت ثلاثة من زملائي كنا متزاحمين على طاولة و كل واحد له درج
وجدت ان المدرسة مجهزة للتعليم بالكامل ولا ينقصها أي شئ
في اليوم الثاني اخذت جدولي وبدأت ادخل الحصص
انبهرت بمستوى الطلاب وحبهم وشغفهم في التركيز بالدرس وتسابقهم لحل التمارين
ومااحد يتذمر من الواجبات لانهم يعرفون ان الواجب ترسيخ للمعلومة وهذا هو اكبر اهتمام لهم
قلت بنفسي : ياحليلكم يالواق واقيين انتم وطلابكم ويازين التدريس بمدارسكم اللي توسع الصدر وتشجع على الابداع
في حصة فراغ رحت لغرفة المدرسين
ماشاء الله المدرسين دايما ً اذا تكلمون يتكلمون في المادة العلمية اللي هم يدرسونه او ثقافة عامة
قلت في نفسي (( ماتلاحظون اني صاير اكلم نفسي واجد !!)) :
الله يرحم حال ابو فلان اللي ماخلا غيبة والا نميمة في زميلة بالتخصص الا وقطع فيه وحشه حش مابعده ولا قبله
في اليوم اللي بعده جاء للمدرسة مشرف تخصص انجليزي
واول ماشفته في الطابور ويجيني غثيان قلت مالي غير اجاريه كالعادة اول مايبدأ واكيد ماراح يمدح
في الحصة الثانيه دخل عندي في الفصل وشرحت الدرس والطلاب الواق واقيين اللي متربين على حب العلم اعجبوني وأبدعوا مع في المشاركة والتمارين
بعد الحصة في حصة فراغ جلست مع المشرف قلت في نفسي : اتوقع يغطي على مشرفي الاول اللي قال ليش ماتغطي قلم السبورة اذا وقفت الكتابة...
بس هذا يمكن يقول ليش ماتحط القلم علي السبورة بدل ماتشيله في يدك طول الحصة
بس انصدمت اول ماقال :
اشكرك عزيزي وزميلي المعلم كان الدرس اكثر من رائع . .... واستلم مدح
ومدح ومدح الين قلت له : وش رايك نعيد الدرس ....... (( الاخ مهوب متعود على المديح هههههه ))
وكلمني عن طرق التدريس واي الطرق كانت طريقتي بالفصل وبصراحة طلع مشرف مثقف وفاهم في طرق التدريس وافادني كثيرا ً
وبالاخير سأل عن التحضير والخطة وتكلمنا فيها شوي ثم قال : بعض النقاط اللي ذكرتها لك خذها في بالك الى ان ازورك المرة الثانية
قلت : ابشر وتامر امر
راح المشرف وجاء المدير وطلبني لسالفة عنده شوي
قلت : افا بدت الغيرة يبي اللحين يحط في من العيوب عشان مااشوف نفسي من كلام المشرف
وبعد ماجلست عنده بالمكتب قال :
ابشرك جاء من الوزارة اليوم قرار تحسين مستواك من الثاني الى الخامس اللي تستحقه
وعطاني نسخه من القرار وانا ماني مصدق
وفجأة واصيح واطامر ... (( اطامر يعني اقفز وانقز فرحة ً وسرورا ً .... خلاص يالمعجم المحيط على غفلة ))
واسلم على المدير قلت له ماقصرت وبيض الله وجهك
قال : وش فيك متعجب ومنت متوقع هالتحسين
قلت : هذا حلم بالنسبة لي ماهوب معقوله بالسرعه ذي
قال : بالعكس روح الان اسأل أي مدرس من زملائك وستجد انه على المستوى الخامس اول ماتعين عندنا
((قلت في نفسي : الظاهر عندهم مدرسين متفقين من بعض ويطالبون بحقوقهم الين يجيبونها ))
وتمر الايام علي في هذي المدرسة من احلا ايام العمر ولاول مرة ماكنت احسب كم باقي اسبوع وتجي العطلة
وفي الفصل الدراسي الثاني قالوا ان الوزير يبي يزور المدرسة
وفي هذا اليوم كنت اقول ياحظ الواق واقيين في هذا الوزير وياحظهم في وزارتهم
وفي الصباح بالطابور دخل الوزير من بوابة الساحة وصار يستمع لاذاعة الصباح وكانت الاذاعة ترحب به وبقدومه
وهو يقف ومعه مرافقيه من الوزارة
وانا اخوكم في الله اسرح في الخيال ...
((دايم مايجي العيد الا اذا سرحت ورحت بجو لحالي وانتم هاللحين كملوا القصة وراح تعرفون ))
وانا اتذكر ايامي قبل انقل لهذي المدرسة وايامي فيها
واتذكر اني تو شعرت بالتدريس وكيف نسيته قبل
وبدون شعور صرت امشي من اول الساحه بسرعة تجاه الوزير على اني اسلم عليه واحبه على راسه تقدير لجهوده و تعبه لاجل الرقي بالتعليم في بلاده في جزر الواق واق
وصرت اسرع اكثر واكثر
حتى صرت اركض ركض
وطاح العقال ... ثم الشماغ ... وطاحت الطاقيه ............ (( قلت لكم ماعاد اشعر بالجاذبية الارضية ))
وانا اركض بالساحه متوجه يم الوزير
والطلاب والمدرسين صاروا يطالعون في وتركوا الاذاعة
وهم مستغربين وش هذا اللي يركض من اول الساحه وموجه يم الوزير وش يبي يسوي
والمرافقين للوزير صار بعضهم يقرب يمه للحماية وبعضهم توجه يمي يبي يردني
والوزير صابه شك ان عندي نية لاغتياله وخاف وصار يتراجع
وانا اركض اسرع من قبل وخلاص حطيت في راسي اني اسلم عليه يعني اسلم عليه ....
واتجاوز حرس الوزير وهذا اوخر عنه وهذا ادفه
واول ماقربت من الوزير ..
وهو يرمي بشته وينحاش برا المدرسة
وانا وراه في الشارع
والحراس والمرافقين ورانا
والمدير والمدرسين وراهم والطلاب معهم ............ (( مشهد سينمائي خخخخخخ
وهو يركض ويقول وش تبى نعطيك .. وش تبى نعطيك .. بس علمني
وانا وراه بدون شماغ ولا طاقيه والشعر كشه وطاير والشكل مرعب جدا ً مع هالكشه
واخر شئ انقز عليه ويطيح وقلت له :
انت احسن مدير قصدي احسن وزير بالعالم كله وابغى اسلم على راسك تقديرا ً واحتراما ً
قال وهو منفجع : .... بس .. هاك . وقرب راسه
عاد بهاللحظة التفت وراي واذا هالحراس قد قربوا يوصولون يمنا و يبون يمسكوني
وانا امسك راس الوزير واحبه بسرعه وبقوة كتعبير عن مشاعري
وياليتني ماحبيت راس الوزير
لاني صحت بااعلى صوت :
آآآآآآآآآآآآآآآآآآآآآآآآآآآآآآآآآآآآآآآآآآآآآ آآآآه
وقلت : ليش راسك حااااار ياسعادة الوزير
واصحى من حلمي
واثري كنت محتضن ابريق الشاهي اللي كان بجنبي قبل الحلم وحبيت الابريق وهو حار واحسبه راس الوزير
وكانت حرارة الابريق لها لسعه بالبرطم مايحتاج وصف .... جربوا وتعرفون ههههههههه
وقمت اغسل وجهي وجاء في بالي فكرة وقلت :
ليش مااقدم نقل السنه الجاية لجزر الواق واق اذا هي موجودة مايمنع !!!
والمعذرة على الاطالة