÷ بانوراما انجلش ÷ ...الحلقة التاسعة

السلام عليكم ورحمة الله وبركاته



مرحبا ً بكم اخوة واخوات



مرحبا بالجميع في منتدى الجميع منتدى سعودي انجلش


من اذاعة بانوراما انجلش


هذه الحلقة سوف تتناول موضوع :


(( معلموا الانجليزي و مجتمعنا ))



الحقيقه ان نظرة اغلب مجتمعنا تجاه معلم اللغة الانجليزية تختلف عن المعلمين الاخرين في التخصصات الاخرى

السبب طبيعة العلم الذي يملكون اذ البعض يراه غريبا ً والبعض يراه عظيما ً


ومما يلفت انتباه معلمي الانجليزي تجاه الناس من حوله بعض الامور منها :



اولا ً : الاعتقاد ان اللغة الانجليزية مجرد علم محدود وليس متجدد ولا متشعب


مثل ان ياتيك شخص و معه وصفة طبية فيها اسماء ادوية وامراض تعتبر في عمق المصطلحات الطبية ويطلب منك ترجمتها

اذا قلت له ( وهذا ماحصل لي ) : هذه مصطلحات طبية لا يعرفها سوف دكتور .

تجده يتعجب : اليس تخصصك في اللغة الانجليزي !!... كيف لا تعرف مجال تخصصك !!

و يظن بعدها انك لا تفقه في الانجليزي شيئا ً :smile (92):


وقد يكون دعاية تحريض ضدك بان اذا ذكرت في مجلس يقول : فلان يقول انه مدرس انجليزي وهو لا يعرف شيئا ً :smile (73):


للاسف كثيرين لا يفهمون معنى مصطلحات طبية وعسكرية وحكومية او تتعلق بالكمبيوتر


ثانيا ً : الاعتقاد ان تعلم الانجليزي يمكن ان يكون في ليلةٍ وضحاها


مثل ان ياتيك جارك ومعه ابنه ويقول لك : ابني عنده غدا ً اختبار انجليزي

ويطلب منك بالحاح تدريسه حتى يفهم


وعندما توافق على مضض تكتشف ان ابنه صفر ولا يعرف حتى الحروف :smile (98):


ماذا يمكن ان افعل معه في ساعة او ساعتين ؟

وهل الانجليزي علم كامل متكامل ام مجرد درس او موضوع قصير ؟


للاسف ايضا ً هذا اعتقاد متفشي


ثالثا ً : محاولة اختبارك وتقييمك باقرب فرصة تسنح لهم


مثل مرة كنت في مجلس ومعنا اخر يتحدث انجليزي

قال لي احد الجالسين : تكلموا انجليزي

قلت له : وش المناسبة ؟ والا تحسب اننا مهرجين نتكلم عشان تسانس

قال : شلكلك ماتعرف تحدث انجليزي وخايف تتعتع في الكلام

قلت : يعني تقدر تقول نص ونص :smile (91):


ومرة كنت جالس مع شايب كبير سبق وعمل في ارامكوا السعودية ويعرف بعض الكلمات

واول ماسمع اني في الجامعة وتخصصي انجليزي ....( ايام كنت بالجامعه )


ويقول : ياللا علمني وش معني نوز هو نطق كلمة ( news) مثل نطق كلمة ( nose)


وانا سمعتها نوز وقلت له : تعني الانف


قال : غلط ههههههههه <<<< يضحك و فرحان بعد انه غلطني :smile (23):


قال : تعني اخبار

قلت : انت نطقتها غلط

قال : انا لي كذا سنة كنت في ارامكوا و كنت اشتغل مع امريكين و ..و,,, وقام يحكي قصة حياته




مااطول عليكم نهاية الموضوع وخلاصته





هل تلاحظون مثل هذي الاشياء و تمر بكم بالفعل ؟


و هل من سبب واضح في رأيك ؟


بانتظار اتصالاتكم

بداية ...

أشكر لك ملامستك هذا الموضوع
- ماشاء الله -

((((( لا فض فوك أخي الفاضل )))))

و الله كأنك معنا ,,,,,,

بالنسبة لوصفة الطبيب , و الجلسة الجماعية ,,, و سالفة التصحيح من الرجل الي يعمل بأرامكو .....

كلها قد حصلت لنا ...
بس يفرق عندي ((( بدل اللي بأرامكو عندي خالي )))
:smile (92)::smile (92)::smile (92):

يتصيد الأخطاء علي ....و هو أصلاً المعلومات اللي عنده خطأ
!!!!!!!!!!!!!!!!!!!!!!!!!!!!!!!!!!!!!!!!!!!!

بإختصار ...

نظرة من حولنا
** معلموا و معلمات اللغة الإنجليزية **

أرى ضرورة تحويلها من السطحية
لتنتقل إلى جوهر مهنة سامية
و لغة على الجميع أن يتعلمها
مع التمسك بأصالة لغتنا الأم
- اللغة العربية طبعاً -

و الله يصلح شأن الفاضين ...
:smile (92)::smile (92)::smile (92):


ألف شكر
أستاذنا الفاضل

حقيقة موضوعكم
سامي الفكرة و راقي الطرح

أسجل إعجابي بما تناولتموه ....



تقبل مروري

يااهلا وسهلا استاذة E.T.Reem


يعطيكِ العافيه ويسعدني بان اجد من لديه نفس الحال على الاقل خفف عني اني لست اعيش لوحدي


واشكركِ على المرور الرائع

وعليكم السلام ورحمة الله وبركاته



حلقة جديدة و موضوع أكثر رائع


عن نفسي أشوف كثير من الناس اللي حولي سواء من صغار او كبار سن ...لهم توجه غير طبيعي لتعلم هذه اللغة


كثير منهم طلبني اني اعلمه انجليزي هو و مجموعه معه........واخرتها قبل يومين جا وحد وطلبني كتاب لسادس


ولو نلاحظ ان الكثير من المنتديات بدأت تحط اقسام خاصة بتعليم اللغة الإنجليزية لشدة الأقبال عليها


اما عن نظرة المجتمع


فمدرس الانجليزي اشوف الناس يحملون له الكثير من الاحترام من بدة التخصصات


(ممكن لأنه شي ما يقدرون يتفلسفون فيه .... ممكن :smile (84): )







والله يا ضحكة على سالفة الشايب راعي ارامكو........وتذكرت ايام الجامعه ما بقوا مكيف ولا ثلاجة الا ويسأوني عن معناها :smile (51):



يسعد صباحك ومساك وجميع المستمعين



Mr.X

ويسعد مسائك وصباحك بكل الخيرات والمسرات



مايسر في الموضوع مثل قرأت انطباعك ورأيك في المواضيع



الله يسعدك ويسلمك ياابو شهد

السلام عليكم ورحمة الله وبركاته


و أسعد الله مسائكم بالخيرات ..............


بصراحة ........ اظن ان ما تطرقت اليه في مقدمتك الرائعة يا English Lover .... واقع يعاني منه كل من تخصص في اللغة الانجليزية او درسها .....


و البعض يحاول اصطياد الاخطاء لهذه الفئة من المجتمع ............ و مثل ما ذكرت بانهم لا يعرفون ان هناك فرق بين المصطلحات الطبية و العسكرية و الهندسية .... الخ


بالنسبة لي ......... اذا مررت بمثل هذه المواقف ارد عليهم قائلة " هل انت تعرف كل المصطلحات و الكلمات في اللغة العربية ؟؟؟؟ " اذا اجاب ب : نعم .... ذكرت له كلمة تحتاج الى توضيح مثل " جلمود " .... و الاغلبية لا يعرفون معناها
فأقول لهم " هذه لغتكم الام و لا تعرفون كل كلماتها فما بالكم بلغة مكتسبة !!!!! " ......


اما سالفة الشايب حق ارامكو فهي بصراااااااااحة نكته .............

الله يعطيك العافية على هذه الحلقة المميزة و بارك الله لك في جهودك .......

وعليكم السلام ورحمة الله وبركاته


اسعد الله مسائكِ بالمسرات shy-rose



بالفعل لو يقارن الكثيرين لوجد ان بعض المطلحات العربية لا يعرفها العرب انفسهم

ومثل هذا ينطبق الحال على النيتف سبيكر للغة الانجليزية


يمكن ان نجد بعض المصطلحات الطبية او الصحفية او السياسية لا يعرفها النيتف سبيكر انفسهم


الف شكر على التواجد الرائع والدائم للاذاعة ومواضيعها


تقبلي لكِ كل الشكر والتقدير

الو .. مرحبا اخ انجلش لوفر ..


آآآ ... آآآآ ... معليش ياخي اول مره اصير على الهوا ونسيت وش كنت بقول !!!







ايه تذكرت ..





والله ان كلامك حقيقي والمشكلة ان ثقافة الناس تختلف

اذكر ايام الجامعه كنت جالس مع رجال اعرفهم على الخفيف واوحد منهم كان احسنهم لغة ولاعب عليهم انه native speaker ويوم قال واحد من الشباب:ترى الدكتور اهلين بسنه ثانية ادب انجليزي

قال بالله ؟ وإلتفت علي

قلت
:بس بروح وطي هالحين يجي الكلام الخاثر اللي مامر علي :)

وقال: What is your name?How old are you?

دريت ان الرجال رايح فيها انبسطت عليه خخخخخخخخخخخخ

طقطقت عليه من كلمات الشعر يوم سكت :)


الإلمام بجميع الكلمات شي صعب للغالية لأن كل قسم له مصطلحاته يعني مثلاً اشتغلت في المستشفى مريت على كلمات مامرت علي اثناء الدراسة والسبب ان دراستي ادبية ومفرداتي كذلك بينما اغلب الكلمات الطبيه لاتينيه مالها دخل بدراستنا بس زين انهم يسوون دورات للموظفين لهالكلمات :)

أما مره غبت عن اختبار وجبت تقرير طبي لأني كنت تعبان جداً وعطيت البروفسور العذر وأنا اضحك اقول في بالي ايه هين بيفهم هالشخابيط:)


مادريت إلاهو يقول :أنت فيك إلم في عظلة الظهر ؟؟ <<<<انتفخ راسي وش دراه :)


لذا من الضروري ان الواحد يطور مصطلحاته قدر مايقدر ...اجل الميكانيكا اروح للفلبيني يكلمني عربي وارد انجليزي واستمريت حتى جا وصف القطع في السيارة قلت: شوف صديق أنا يبغى فحمات غير بعدين فيه تفتفه بالمكينة ممكن فيه (problem) بالبواجي هههههههههه



على فكرة احياناً تكون اللغة نقص على الواحد

مره كنت طالع من المدرسة (هاج) هههههههههه يمكن طلعت 9:30 وعندي سابعة :)


دخلت البيت
ولبست قلابيه
و شغلت الكمبيوتر
وجنبي كاس شاهي

مروق على الاآآآخر ...
ويدق حضرة المدير: دكتوووووور وينك ياشيخ؟

أنا: قريب ..سم ش فيه؟

المدير: تعال ضرووووووووووووووووري عجل الله يعافيك.


واقوم واغير ملابسة وصارووووووخ للمدرسة وادخل غرفة المدير عرض(الفرامل خربان) ههههههههه


واشوف عنده ضيف ..

قلت للمدير سم؟؟

قال:شف الاخ (فلان) مشرف المادة الفلانية <<<<ماهو انجليزي يعني !!

بيسافر امريكا والسفارة معطينة ورقة..

((((يعني جايبني من البيت علشان اعبي له اوراقه ؟؟؟ )))) صدق مايستحي هو ولا هالمشرف بعد
ماكثر الله إلا مكاتب الترجمة

ويعطين هالنماذج وهات ..وش اسمك ؟ وش اسم امك؟وين بيتكم ؟وليش بتروح ؟ و و و و


خليها على ربك بس



معليش اخذت من وقت المتصلين الحين يدقون ويصير مشغول :)



انجلش لوفر

سعدت بمكالمتك واشكرك على هالبرنامج الرائع وندي اقتراح لو تزيدون وقته من ساعة لـ3 ساعات علشان ناخذ راحتنا بالكلام <<< على باله مختصر ههههههههههههه

اقتباس:

---

آآآ ... آآآآ ... معليش ياخي اول مره اصير على الهوا ونسيت وش كنت بقول !!!

---

ممكن تقصر من صوت التلفزيون وتكلمنا من هاتفك :smile (49):


.....

ياهلا ومرحبا باالدكتور اهلين

حياك الله


......



هههههههههههههههههههههههههههه


اعزائي المستمعين ناخذ فاصل و نرجع .... ودي اتمدد واضحك :smile (77):


نعم .. زين .. ابشر ....

للأسف المخرج يقول معصي :smile (68):واذا طلعت فاصل هو اللي بيطلع ويخليني لحالي بالاستديوا ( مصدق انه مذيع وباستديوا وهو ماحوله غير ولده يجر ثوبه



اتحفتنا بقصصك ومامر عليك من مواقف يادكتور

ولو دريت كان نفرغ لك حلقة كامله و نخصصها لك


اعجز وانا اقول لك ماقصرت

الف شكر يادكتور على تواجدك الرائع

يا سلام على الموضوع الرائع

اخوي

كلامك صــــــحيح وواقعي 100 &#37;

فالجميع اكيد مر بمثل ما قلت ,,,

ولكن على الشخص ان يظهر بطبيعته مع المجتمع

اذا يعرف يقول اعرف واذا ما يعرف يقول ما اعرف ....

بها العباره يريح باله ... ويتجنب الاحراجات ...

في اللغة العربيه وهي لغتنا اشياء كثيره لا نعرفها ...خاصة ما يتعلق ببعض اعراب ايات القران الكريم ..

ونحن السعوديين لا نتحدث الانجليزية خارج العمل فمعظم حديثنا باللغة العربيه وهذا يجعلنا ننسى الكثير والكثير من المفردات ..

اما بالنسبة للاختبارات تقفل الموبايل احسن (( لانك تعرف الطالب اللي يقول ذاكر لي ليلة الامتحان )) ما يعرف شي اصلا ..

اما تخصص اللغة الانجليزه فهو من اجمل التخصصات ... لما فيه من الفائده لمتعلم اللغة في جميع الاحوال ..



طلب اخير اخوي .... (( سلم لي على الشــــــــــايب )) هههههه


وشكرا

اخوك

al harbi

حياك الله اخونا الحربي


.......


فكرة تقفيل الجوال ماهي شينه الا ان كثير منا لا يستطيع التهرب لان احيانا يكون اخوك يطلب منك هالطلب ومافيها فكه

ويبلغ سلامك للشايب وبالانجليزي الفصيح ههههههه


وتسلم على تشريفك للموضوع