طلبي هو الدعم المعنوي وبعض النصآئح

السسسلآم عليكم والرحمه ..
كييف ـآلحال ؟؟

أنآ طآلبه أدرس أدب اللغه الأنجليزيه ..
والحمدلله حآبه قسسمي مرره و كل يوم أحس لغتي تتطور وأسلوبي الأدبي يتحسسن ..
أنـآ الحين بسنه ثـآلثه ..
وطلبي منكم مره بسيط ..

أنـآ طبعآ قلت بحط هالطلب هنـآ ..
بمـآ إنو في طآلبآت متفوقـآت " مشآلله عليهم "
في دكـآتره وأسـآتذه وأهل خبره ..

لغتي الكتـآبيه الحمدلله مو برفكت صحيح بس جـآلسسه أحس بتطورهـآ ..
مشكلتي تكمن في الكلآم و البرونآونسيشن ..

أنـآ من لمـآ كنت ثآنوي كآنو يسموني دفرة ورق ..
مدري ليش بس كذآ ربي خلقني مـآحب أسسمع الكل صوتي ..,
أحسس أحيآنـآ إنوو مـآله دآعي أو إني أسستحي أبدي رآيي ..
وطبعي الأنطوآئي زآد من الطين بله ..

عندي الأسسبوع الجـآي برزنتيشن لمآدة اللغويـآت ..
ولو أنه امتحان ورق مسستعده أحاول واجيب فيه الفل مـآرك ..
بس شرح للبنـآت !!

بنـآت طول الـ 3 سنين اللي قضيتهـآ بالجـآمعه مـآكـآن لي أي إتصـآل معهم إلآ بسييط ..
طبعا بحكم قسسمي فـأالبرزنتيشن حصل من قبل ..
وعششـآن كذـآ إنصصصصدمت من نفسسي ..

يآ نـآس مذآكره وفآهمه المعلومه ..
أكلم نففسسسي بالبيت إنجلش أحس لغتي روعه ..
مفردآتي وآضحه و حلوه ..

بالجـآمعه ..
تتقلب الموآزين ..
حـآولت أدعم ثقتي بنفسي بس مـآفي فـآيده ..
أرجف وصوتي يرجف والكلآم مـآيطلع معي مضبوووط ..
واللي يسسمعني بالجـآمعه يقول مسسستحيل هذي بنت إنجليزي..ّ!

مـآدري شسوي بالضبط ..
شلون أقدم عرضي الأسببوع الجـآي وأنا من دآخلي مليون خوف ..
أسـأل نففسي طيب لييش ومن شنوو أخاف ..
بس مـآفي فـآيده ..

طولت عليكم ..
بس إنتو يـآ أهل الخبره ..
ويمكن حد مرت عليه هالحـآله وقدر يتخلص منهـآ ..
سـآعدوني .. قولوآ لي كيف أتكلم بثقه ...
كييف أوصل المعلومه صح ..
كييف مـآ يرجف صووتي وأنـآ أتكلم وألعثم نصص السسـآلفه ..

أحسس إني لآزم أرآجع دكتور نفسسي وإلآ حـآلتي هذي يبي لهـآ شي معين وتتحسسن ..
أفيييدوني ..
كنز العمر تعطووني بإفـآدآتكم ..
دعوآتي لكم بظهر الغيب ..

" أذآ كآن لآبد من أخذ دورآت .. فأنـآ من سكآن المنطقه الشرقيه .. حد يفيدني بمكآن ممكن يحسن حـآلتي "

سلـآإم ..!

وعليكم السلام ورحمة الله وبركاته ,,,


هلا بك خيتوو ,,

طبعا انا مو مثلك ما شاء الله توني سنه اول بس الحمد لله احس ما عندي مشكله في النطق ...
شوفي خيتوو ..

ما بتفلسف عليك بس بقول لك الكلام الزين ..انتي مثل ما قلتي انك ما شاء الله ((دفرهـ)) وعندك خلفيه تماام في اللغه اذا كذا ليه الخوف .. على عكس بعض البنات اللي مو عارفين شي باللغه ,,


بسم الله عليم ما يحتاج دكتور نفسي ولا هم يحزنون انتي المفروض تكونين واثقه من نفسك عشان تقدرين تتكلمين ..

بقول لك شي .. عندنا بالجامعه مسوين reading club

لجميع طالبات القسم من اول الى خامس .. وسجلت فيه ,, وكتب علي ربي ان الدكتوره تختارني اقرا قصه قدام الله وخلقه ,, وانتي عارفه كيف الحاله ,, نظري ضعف يديني ترتجف وعطشانه وبموت من الحر مع ان الجو باااارد بس خلاص لازم اقرا والا الكل بيقول ذي وش تسوي هنا بالقسم ..

طنشت الكل وتخيلت نفسي اقرا في البيت .. وكل ما ارفع راسي اناظر زميلاتي بس .. وقريت ولله الحمد ..

شوفي فيه حل لمشكلتك انك تتعرفين على بنات من قسمك وتحاولين تتكلمين معاهم عشان تتعودين ..

وحطي في بالك انها فرصة عشان تثبتين نفسك وانو اذا ما قدمتي عرضك زين ما بتنفعك مفرداتك ولا شطارتكـ.. وانتي تتعلمين انجليزي عشان تتكلمين مو عشان تكتبين انجلش

الله يوفقك وييسر لك ولا تنسين علميني وش يصير معك لان انا عندي شرح في ماده listening and speakingالاسبوع الجااي... الله كريم

تسسسلمييين وربي ..
خلآص صـآر بحــآول ..
ويـآرب أقدر ..
الأربعـآء الجـآي هوو ..
بقوي نفسسسي ..
وي رب أنجح ..

أسسستقبل أي نصيييحه منكم ..
سلآإم

السلام عليكم ورحمة الله و بركاتة


حلو جدا انك عارفة الخلل فين بالضبط وايش ينقصك و من هنا تقدري تبدأي مشوارك علشان تنمي مهارتك التحدثية


الانسان مايولد واثق بنفسة لكن عليك ان تثقي بنفسك و بقدراتك وانك قدها بإذن الله كخطوة اولى


الخوف من مقابلة الجمهور او الحديث مع مجموعة او تقديم موضوع يتطلب الجرأه
انتي مو مريضة ابداً بس زي ماقلتي يبي لك التشجيع و الدعم المعنوي علشان تعرفي شقد انتي قادرة على العطاء في مثل هالوضع :)


ريلاكس و سمي بالرحمن و اذا لغتك التحدثية تحتاج منك التطوير تكلمي مع اللي حولك و اقرأي بصوت عالي و قولي بداخلك انا ليش اخاف؟ مافيه حاجة تخوف اصلا



تدربي على البرسنتيشن مرة و مرتين و ثلاث




موفقة غاليتي

انا صراحه...اذا ودي ارجع الجامعه...برجع علشان اقدم البرزينتش بطريقه سهله
مو مثل ماكنت متصورها....وكان النوم مايهنى لي قبل العرض بيوم...آآآه بس

والله اذكر آخر عرض لي..كان في المستوى السادس..

آآآه بس كل ما اتذكره..اقول ليش كنت خايف....وشاد نفسي..الوضع اقل مما كنت متصوره..

بحكم طبيعة عملي حالياً...انصحك بعدة اشياء

اول شيء لازم تؤمني بداخلك انك...قادره...وعندك نقاط ايجابيه كثيره"وهذا للأمانه واقع" من خلال كلامك عن نفسك..

الشيء الثاني...اذا كنتي حاسه انك راح تواجهي مشكله التحدث..
جيبي لك كراسي في البيت...وأبداي بالتحدث..
اول مره بستغربي الشيء هذا..كرري هذي الحركه الين تحسي انك خلاص اخذتي على الوضع...


ثالثاً اثناء العرض
وانتي تتكلمين...لا تفكرين ابد ابد ابد في اللي قدامك..
يعني خلي اللي في بالك هو الفكره اللي حابه توصليها..للطالبات..
"يارب اكون قدرت اوضح لك ذي النقطه" اذا ما فهمتيها بعيدها بأسلوب ثاني..

وبعدين خذيها قاعده....ترى مدى تخليك عن اللي يقوله الناس عنك هو مجرد 10% على حسب كلام الكاتبه "ليلى"
وكلامها بالفعل مررره منطقي...يعني أغلب الناس يفكر في اللي قدامه...وكيف راح ينظر لي ..لمن اسوي الشيء الفلاني..
بينما النسبه الحقيقه لمن يفكر بهذي الطريقه هم فقط...10%

توكلي على الله...
ومارسي أكثر من مرره
وبعدها ...استمتعي..
يعني
اول ماتبدأي العرض..لاتقولي في نفسك..متى انتهي وافتك

لا لا اجلسي في كل فكره.. وخذي وقت واشرحيها باسلوبك
واخيرا..تكلمي بنبره مسموعه وودوده...
واجعلي فواصل بين كلامك عموما
الفواصل "صمت بسيط"

يعني مثلا...
تقول اليوم عندنا عرض عن انواع السيارات"تصمتي شوي 3 ثواني"
وبعدها تقولي انواع السيارات اليابينه والايطاليه والالمانيه..وتصمتي شوي..

الطريقه هذا تشد..انتباهم لك..

الله يوفقك
اذا عندك استفسار معين
ممكن نساعدك

يووووووووه ان كان انا بحكيلك عن فضايحي بتموتين ضحك .. تراه شي عاادي ولا هو مرض ولا شي ..بس توتر بسيط ويزول بالتحضير السليم ..

انا اول برزنتيشن سويته كان بالجامعه باللغه الفرنسية وكنت واثق من نفسي ومن طلعت قدام زملاي الطلاب وتضيع علومي وابدا اخربط واجيب العيد شوي وبعد 5 دقايق الا حسيت انه مافى اى سبب يخليني اتوتر اتكلم واريح اعصابي وصرت اذكر الجمل ببساطه ولا اعقد الموضوع جمل سهله واتحدث عنها بهدوء وابتسم .. وشوي شوي يوم صرت اتفلسف واكتب على السبوره وماشيه اموري ..

وبعدها صرت من برزنتيشن الى اخر بدون مشاكل .. وسافرت ماليزيا زمان ودرست فيها وسويت برزنتيشن ونفس الحكايه لانه كان باللغه الانجليزية .. وخربطت فى البدايه وجبت العيد وبعدين راح الموضوع وصرت مبدع فى البرزنتيشين لدرجه انى كنت بالمعهد اسوي يوميا 2 او 3برزنتيشن ..

اخذي النصايح منى ..

حضري نفسك فى البيت وانطقى الجمل بصوت عالى مو فى سرك .. ونظمي نفسك يعني مو تقولين يتكلم فى كذا وكذا وكذا ... لا حددي ان فى اول الوقت بتكلم فى مثل التعريف بالكاتب .. وتروحين تقراين وتحفظين جمل وتجربين نفسك فيها .. وبعدين الفقره الثانيه مثلا فكر الكاتب او فلسفته . وتروحين تركبين جمل وتعرفين وش تقولين وتحفظينها وتنطقينها بكل رويه وهدوء وزي ما قال زميلى اللى فوق خلي لحظه صمت بين كل جمله او جمله .. اوقات اذا حسيتي انك بتخربطين اذا طالعتى فى الطالباات طالعى فوق روسسهم لا تطالعين فى وجيههم وتشوفينهم يناظرونك وتخربطين هههههههههههه خلي نظرتك شامله مو فى شخص معين ..

واقسم بالله خذيها منى انه موضوع طبيعي جدا وليست مشكله تستحق العلاج بس جربي .. انت تخافين من البرزنتيشن سويه مرات كثيري وشوفى كيف تروح المشكله .. انا الان اقف امام الف ولا عندى اى مشكله

واى دعم معنوى اخر انا موجود .. واى نصايح انا بالخدمه


والله يوفقك يا بنتي

<< تحسينه شايب يوم يقول بنتي ههههههههههههههه

مشكووووووووووووووووووورين والله على هذا الدعم المعنوي لان تقريبا اني هم عندي نفس المشكلة وان شاءالله انا واختي كبرياء ناخذ بنصايحكم كلها ومن الله التوفيق