مشكلتي مع فصلي ؟؟؟ أرجو الدخول وكتابة أي حل

السلام عليكم ورحمة الله وبركاته .كيفكم مدرسين ومدرسات . طبعا اخوكم نازل تربية عملي وآخر ترم بجامعة طيبة بالمدينة المنورة . طبعا بعطيكم موضوع مفصل عن الي ساير معاي وردود بعض الأصدقاء بالفيس بوك

حبيت اليوم أشارككم بمشكلتي التي تعبت معها ومنها ^_^ طبعا أول شيء أنا أدرس صف أولى وعددهم 40 طالب بكل فصل معاناتي معاهم في تسكيتهم وشد الانتباه للدرس اوك . حاولت معاهم بالطيب وبالحماس

بعض الأحيان تنفع والأغلب ماتمشي كويس يعني فيه فوضى بالفصل ولو شيء بسيط . طلعتهم للمصادر وأناشيد للحروف والأرقام مشيت معاهم كويس لكن حدي أقفل النشيد يرجعوا يتكلموا لكن لاحظت إني بالفصل أسيطر ع الفصل أحسن من المصادر بكثير . مشكلة المصادر الكراسي دائرية وتعالوا شوفوا أم التكويع ع الكرسي وسواليف لكن بالعافية أرجعهم للدرس

معايه والله تعبت من الحاله هذي ولازم يكون صوتي مرتفع بالحصه عشان الي يتكلم أول ما أطل فيه وأرفع صوتي يسكت من جد من جد أم الحالة بعد كل حصة آخذ حبوب مص للحلق أحس حلقي بيتقطع . بعض الأحيان أعصب وأتضايق من الموقف هذا وبعض الأحيان آخذها على إنهم توهم من الإبتدائي مايقدر يسكت الطالب طول الحصه لكن والله أحاول وأخليه يتكلم بس

بالمشاركات معايه بس برضه فيه ناس ماهي معايه نهائيا وتتكلم حدي أبحلق فيه يسكت أنشغل عنه يرجع . هذا غير الي ينام وأصحيه تعبت وأنا أقول "يافلان don't speak, sleep " فكرت إني أستخدم العصايه (لأنه الاستاذ الأساسي مستخدمها وما تسمع ولا كلمة ) يعني استخدامي للعصاية ولو للتخويف فقط لكن إذا استدعى الأمر أضرب لكن مدري محتار وماودي أسوي الشيء هذا لكن بالله عليكم قولولي وش أسوي معاهم حاولت بجميع الطرق ؟؟؟؟؟؟؟؟؟؟؟ هل تتوقعون السبب بعددهم
؟؟؟؟؟؟؟؟؟؟؟

بعض الزملاء قالي

نصيحهـ لا تفكر ابداُ انكـ تضرب او حتى تدخل عليهم بعصايهـ ,, والله رح يكرهوكـ ,,

ووراني فيديو لفصل كل الطلاب ساكتين والمحفز هو الحلاوة اوك ورديتله بـــــ

العدد الي بالفيديو 20 طالب فقط وكل طاولة عليها 5 طلاب أنا أقل شيء يكون ع الطاولة الوحده 8-10 طلاب وأم المضاربات ع الكراسي مافي كراسي تكفي ؟؟؟؟؟؟؟؟؟؟ والله لو عشرين كان عسل على عسل أصلا أنا الآن مسيطر على أكثر من نص الفصل لكن الباقي مشاغب اوك بعد كذا الي ساكت راح يسوي زي ما بسوي خويه الي قاعد يتكلم يعني أنا أقولك فيه مجموعه خلصت التمرين اوك وع طول لك لك لك لك لك لك وأنا قاعد أشرح للباقي طبعا الي ما حل ويشوف هذولي يتكلموا راح يطنش التمرين ويقعد يتكلم ؟؟؟

والله العظيم شيء يقهر تدرون ليش يملون الفصل كذا عشان حضرة المدير ياخذ بدل قيادة يبدأ من 1500 الى 4000 ريال ع حسب عدد الطلاب الي بالمدرسة فلازم يملي الفصول من الطلاب عشان يوصل للبدل أبو 4 آلاف والضحية المدرسين حسبي الله ونعم الوكيل (لو بسوي موضوع الحلاوة يبغاله ميزانية مقصف لحاله ^_^ بعدين تعال كيف بالله نمشي موضوع الحلاوة والجامعة موقفين المكافأة بحكم إنك عديت أربع سنين وأنا والله ما أخرت هذا الترم إلا عشان المسؤولية الموجهة للطالب لأنه بالخطة الدراسية حاطين مع التطبيق 4 مواد وهذا حمل كبير على الطالب إنه يوفق بين الإثنين ؟؟؟؟؟؟؟؟؟؟؟؟؟؟؟؟؟؟؟؟؟

تخيلوا اليوم حضرت حصه انتضار لسنه ثانية متوسط العدد 30 أو 25 طالب والله العظيم ماسمعت ولا صوت وأعطيتهم انقليزي ايش رايكم وضحك وسوالف وأحلى حصه ؟ أحس الي مجنني كثرة الطلاااااااااااااب؟


برأيكم هل المشكلة مني أنا أم من الطلاب ( نظرتهم للمتدربين ) أم من عدد الطلاب ؟؟؟؟؟؟؟؟


شكرا

لا المشكله اكيد فكثرت الطلاب
حتى انا نفس المشاكل تصير معي بفصل واحد الي فيه تكدسسسس بنات
ولافصل ب هدوووء ومشاااركه مو بطاله ونشاااط مو طبيعي الحمد لله
بس اتوقع شوي حززززززززم يمشي الموضوع حتى لو تظطر تغير المجموعات الى كل وحد لحاله
جرب وحتشوف ,, بدون ضرب او هواااش انا ضد هذا الشي بس لمن تعصب مثل ناضر لهم ولا تتكلم
يعني حسسهم انك متضايق , وحاول تعاقب بعض الاولاد مثلا انهم مايشاركون فلعبه معاكم او ماتعطيهم
حلوى او شي . اتمنى اكون فدتك ,,,

شكراً لك الله يسهلها


تحياتيـ

بعد التحية .. اخي alhager

" حبيت اليوم أشارككم بمشكلتي التي تعبت معها ومنها ^_^ طبعا أول شيء أنا أدرس صف أولى وعددهم 40 طالب بكل فصل "

افترضت بأنك تدرس الصفوف الأولية ( ابتدائي )رغم انك بالمرحلة الأخيرة بالجامعة , إلا ان كنت متخصصا بالابتدائية او رياض الأطفال.

على اي حال (40 طالب في الفصل !! nuncence اعانك الله على بلواك)
و ان كانوا في المرحلة الثانوية , هم بحاجة الى الضبط . و لكن بما ان الوضع هو كذلك , اقترح بأن تقسم تلاميذك الى مجاميع صغيرة (4-5 طلاب) يعني اربع مجموعات منفصلة واشغلهم بتدريب يحتاج الى تركيز عصبي حركي ( يدين و عينين , و قليل من الانتباه) و خص التلاميذ الأكثر اجادة للمهارات بهذه التمارين .
يبقى لديك عشرون تلميذا , يمكنك ان تطلب المساعدة من مدرس المادة (يفترض انه يشرف عليك في الحصة ) فقد تكون مهمته الاشراف على المجموعات الصغيرة - مع ترددك عليها و اعطاء الملاحظات و التشجيع . و تقوم انت بمهمة موازية مع المجموعة الكبيرة.

اقترح على المعلم الأول هذه الآلية , مع تمنياتي لك بالتوفيق و النجاح .. و الحلاوة لأفراد المجموعة المنضبطة .. بدون كلفة .

حقيقة يا ولدي العدد كبير وصغار سن يعني مجهود اكثر بس عليك بالتشجيع هذا السن لاينفع معه الترهيب حاول تلفت انتباهم بالصور والقصص وسويلهم لوحة تشجيعيه يعني الولد الهادي نحط له نجمة وجيب معاك علبة حلاوة واعطي بس اللي يكون هادي وياخذ نجمة الله يوفقك وجميع اولادنا يارب

السبب بعدد الطلاب لكن استخدم معهم اسلوب التحفيز مثلن الطالب اكثر ادب واخلاق حتى اذ مستوى الداسي متدني كرمه امام الطلاب الله يعينك ولاتعطيهم وجه بزيادة عصب عليهم

اعانك الله على هذه المسؤليه ....وكما قالوا الاخوه ان اسلوب الترهيب لن ينفع بل سيعقد العمليه التعليميه .... وبما ان الطلبه في الصف الاول فاعتقد ان الطريقه التي سوف تجدي معهم هي المكافاه والتشجيع يمكن راح تتعب بالبدايه ولكن سترى النتيجه يعني هدايا رمزيه مغلفه بشكل جذاب شيق,,, للطالب الهادىء والمنتبه ...ايضا ارسم على لوحه شجره كبيره وبها اوراق على عدد الطلبه ,,,,والطالب الهادئ المشارك ضع اسمه ...وضع على يده او اي مكان تراه مناسب استكر لشخصيات كرتونيه محببه او نجوم ....وفي اليوم الثاني امسح الاسماء الماضيه واكتب الجديد ...واترك اللوحه امامهم لتحفيزهم ....وسترى المنافسه والاقبال للفوز بهذه الجوائز ... اتمنى ان اكون قد افدتك

اعانك الله يا اخي ولكنها فترة وتعدي بخيرهاو كل ما فيها من تجارب تستفيد منها في المستقبل لا تقلق خذ الوضع عادي وايام الميداني راح تتذكرها بعدين وتندم انك اعطيتها اكبر من حجمها بل سستذكر كل اللحظات الجميله فيها

YOU can see a vedio about an excellent teacher his way in the class or out it is wonderfulyou should put the feeling of students at the first then do your job step by step don;t worry ask Allah to guide you

وعليكم السلام

اول شي الله يعينك عدد الطلاب مرة كثير كنت مثلك في التربيه العملي ادرس فصلين متوسط

وعدد الطالبات في الفصل يوصل اربعين وكنت اتعب وحلقي يعورني والحاله حاله

كانوا الطالبات مشاغبات جدا وحركاتهم كثيرة لكن حاولت اكون حازمه معاهم وكنت كل حصه اختار

3 او 4 طالبات يكونون ستارز( نجمات الفصل اليوم) ونهاية الحصة اكتب اسمائهم على السبورة

واعطيهم هدايا او وردة يعني شي بسيط ونهاية كل شهر اكرم المتفوقات والهادئات بهدايا وشهادة تقدير

.....ترى المشكله بعدد الطلاب مو فيك حاول تقسم الطلاب مجموعات ولكل مجموعه اسم والمجموعه

الفائزة والهادئة تعطيهم درجات زيادة او حلويات ترى الاولاد يحبون المنافسه بينهم والله يوفقك ويعينك

والله صارت معي نفس ماصار معي ولكن قالي مدرس يااخي هذولا ماينفع معاهم الا العصا وترددت ولكن بدون فائدة وجبت العصا وضربت بعضهم وصارت الامور مائة بالمائة
جرب العصا ولاتتهاون

اقتراح ان تأتي بالعصا تخوويف فقط دون ضرب فقط تخويف الضرب ممكن ان يتسبب بمشاكل ليس لها نهاية وقد يتعرض الطالب لعقده نفسيه او يشتكي والد الطالب
اما التخويف بالعصا فانا اكيده انه سيجدي نتيجه
وان تاتي بالحلوى لمكافئة الطلاب المتميزين ولااااااااتكلف على نفسك ابداً
تستطيع ان تحضر على بيل المثال كيس يوجد به حلويات صغيره مثل اللذي يقدم فالضيافه توكس سنكرز مارس وكل طالب تعطيه حبه او حبتي


فالحلوى للتحفير
والعصا للتخويف

والله الموفق

غيّر ترتيب الفصل الى كل واحد لحاله وكأنهم في اختبار هذا افضل حل مع عدد الطلاب الكبير بس مشكلة يضيع الوقت لو كل مره بنسوي كذا ..

و ترتيب الفصل لمجموعات شي يساعدهم على الازعاج والكلام الكثير ..