@ نظريات في المغازلة حسب طريقة فيثاغورس @

**Mr.X** · 15-05-2005, 09:34 PM

نظريات..في المغازلة..ونتائجها..

المشهد الأول..

الولد مشعل..ويدلعونه مذوبهم.. البنت..الفطمي..ويدلعونها أيضا الفطمي..واذا راحوا لخوالهم بجده يسمونها فتو..
يدق جوال الفطمي وتنقز تشوف الرقم..مكتوب ماي لووف كالينق يو..وتتشقق من فرط الوناسة..وتروح تشرب مويه..عشان تضبط صوتها..وربع ساعة تتنحنح لين بغى يطلع مصيرها الثالثطعش..((يشبه الإثنى عشر))..عقب ماخلصت من سمكرة الصوت..الا الجوال خلص من الدق.. وتضطر تروح تدق.. الفطمي : الوووووووووووووووه.. مشعل : اهلين...يا أحلى الوووه سمعتها.. الفطمي : على حبيبي..مشتاقتن لك..يابعد معاليق قلبي.. مشعل : وانا ذابحني الشوق..(( يقولها وهو يناظر التلفزيون )).. الفطمي : ياعمري...ياخي ياملحك..وه تراي رايحتن خرخر معك...بس اثبت لي انك مشتاق لي.. مشعل : كتبت فيك قصيدة..((وينقز يختار لها احلى قصيدة.. لبدر بن عبدالمحسن..خابرها ماتعرف الا امرؤ القيس )).. الفطمي : ياويلييي...اغدي كشنه...اصير مرقوق..واااتسبدييييييه...من� �اب قادرة اتحمل.. مشعل : ايه طيب..(( يقولها وهو حايمه كبده وش ذا المخقه )).. الفطمي : ياحبي لك...امممموووووووووووووووو� �وووووووح على خشك.. مشعل : أحلى...وش ذا.. الفطمي : هذي مطخه ابعبر لك اني صايرة تقل طاسة منعفطه من زود حبي لك ..(( يقالها يعني قايله كلمة رومنسية )).. مشعل : ياحياتي انتي...يا أحلى شي بدنيتي.........بس ابي اشوفك.. الفطمي : هاااو ؟؟ وشوله تشوفن...بعدين وشلون...طيب وراه...وش عشانه..طيب تهقى اعجبك..(( هالكلام وهو ياكل بردقان مهوب لمها )).. مشعل : موب شغلي...ابمرك بالسوق..وتشوفيني واشوفك...وخلاص.. يوم جا الموعد..والآنسة الفطمي..طامرة للسوق..المذكور..ومشعل في تلك الحزة كان يرقم بشارع الحوامل..ماجاب خبرها.. دقت عليه.. الفطمي : حياتي وينك..بسم الله عليك..وراك ماجيت.. مشعل : الا جيت..انا اللي معه فياقرا.. الفطمي : ماشفت فياقرات .. مشعل : ايه موزيها بعيد...أخاف عليها..(( جاي بكرسيدا حقت واحد من العيال بعد )).. جا مشعل..وشاف الفطمي...وطلعت بنت حلوة..وطاحت بذا الخربطه..مع واحد الضمير عنده مستتر مرفوه بالنصبه الظاهره..

نستنتج أن..ملكع + دلخه = ضياع مستقبل الدلخه..

المشهد الثاني..

الولد اسمه سليمان..ويدلعونه السلمنّه...البنت اسمها ساره..ويدلعونها سوسو.. كان السلمنه..ولد ناس..ومطخطخ..يتمتع بغباء قاتل..حبيب..ووسيم..على نياته..باختصار دلخ ووسيم..ومعه فلوس.. ساره..بنت ذهينه..لعابه..تحب الإستعراض.. كان السلمنه..يتمشي هو وامه بالسوق..ومر من عند ساره وصديقاتها.. قالت ساره : تتحدوني اليوم اخلي هالحلو يكلمني...واسحبه على وجهه بعد..؟؟ وفعلا السيد سلمنه..ماهي الا سبع ثواني..الا هو رايح وطي..بعد ما مارست عليه ساره اسلوب التخقيق وهو له علاقة طردية..حسب مبدأ سقراط (( بدا النصب ))..وبعد ما انتهى فاصل الترزز.. بدت ساره بأسلوب..الغلطه اللي يقالك مادري..(( هذا قانون فيزيائي من تأليف ساره )).. فبدأت بالسواليف معه..يقالها غلطانه..ومضيعه ماتدري وين الدرب..ولو سمحت ممكن تدلني مواقف السيارات.. ويطمر السلمنه..يبي يوصف لها..أول مايجيك..محل نيكست..اصفطي يمين..وروحي قبله..لامنه صار الدرج بحجاجك الأيسر..وصار ابوحمزة السيكيورتي..مناطحك..روحي يسار متيمن..يعني بدرجة 44 شرقاُ.. ساره : يووه اش ذا...لا ياخي ودني..انته.. يوم وصلها للسيارة..وتسدح له اربع كلمات من ذوات الوزن الثقيل..(( مثل ياعيوني..و هاهاهاااي..و مو معقوله ..و وااااو ))..وهي من تلمح له..ماعندك جوال..ومن ذا الكلام..وهو قاعد يشرح لها مواصفات الرهيب 2001 .. واكتشفت ان السلمنه..يبيله اربعه يجون يشرحون له انها تبي رقمه..وبعد انا ضاقت ذرعا..وبدت تخرب الأخلاق .. قالت ساره : اذا رقمك مميز..وريني اياه... وفعلا السلمنه..سدح رقمه..وشوي ويعطيها رقم فاتورة الكهرب.. بنفس الليلة دقت عليه..وسكرت.. وكان السلمنه..قاعد يكتب ورقه بالكلام اللي يبي يقوله..واثنين من اخوياه..يسمعون له الكلام.. دق عليها السلمنه : مساء الخير..والإحساس..مساء رهيب..وكويس..مره..(( اخس يالأسلوووب )).. ساره : اهلين...ياحلو..كيفك عيوني انته..(( انته ذي خلت السملنه..يصير كنه قرانديزر يوم يتصفق من فيقا فيقا..)).. السلمنه (( كان قاعد جنب المكيف..والهوا طير الورقه وتوهق )) : هاه..ايه تمام..اهم شي اني اسمع صوتك...واقلبيه منيب مصدق اني اكلمك.. ساره : ليه ياقلبي....وحبيبي..(( يوم قالت حبيبي..بدا يكبر خشمه..واصيب بانقطاع الرباط الصليبي بكوعه )).. السلمنه : احبس..يا احلى شي.. ساره (( وهي تنتظر مشعل يدق على الثابت )) : هاهاهاااااااي...يعني لو أطلب منك أي شي تسويه ..؟؟ السلمنه : لو تبين اعطيك ابوي..عادي.. ساره : لا ابيك تسدد فاتورة جوالي...وبس.. وهنا دق مشعل..على خويته ساره...والسلمنه..من الصباحية وهو طاق اللطمه وصاف طابور بالبنك..يبي يسدد الفاتورة..وانواع السعابيل من كثر التفكير بساره..

نستنتج أنه...دلخ + نصابه = حالة تطفير تصيب الدلخ..

المشهد الثالث..

الولد اسمه بندر...والبنت اسمها مها.. تعرفوا على بعض بالأنترنت..ويدق عليها من التلفون الثابت..
بندر : مساء الخير..يا أحلى طير..واغلى مها شفتها..وحبي الأول والأخير.. مها : هاهاااااااااي...منتب عاقل يا الرومنسي.. بندر : هع هع ....تصدقين..اليوم كنت جاي من زواج بالأنتركونتيننتال..بس ماعجبني الأكل..(( أحلى اكله اكلها جريش مسويته خالته سنة السبله ..الموافق 1966 ميلادي )).. مها : ايييه..تعلمني فيهم..مره اكلت بعرس زميلتي الأميرة..خديجة (( اما اميرة واسمها خديجه ايه افلقني ))..تصدق ..رجعت للبيت جوعانه ((كل يوم اربعاء يتقاطون يتعشون شاورما على بالهم حفله نهاية الأِسبوع )).. بندر : اليوم في الفيصلية..وانا جاي بالبي ان اللي توي شاريها..خليت السواق يوقفها عند الباب..مالي خلق امشي..(( في عام 1405 مر من عند بيتهم كابرس وسوو عزيمة بمناسبة مرور سيارة تفتح النفس شوي )).. مها : وش هالصدفة...انا كنت جايه بالفياقرا..الوردي..ووقفها السواق جنب سيارتك..(( حصلت على جائزة احسن وحده تركب بصندوق الددسن ولا تطير عبايتها )).. بندر : وانا بالفيصلية..اربع بنات يلاحقوني..من مكان لمكان..دايخيين علي..وانا اتهرب منهم..بعدما ازعجوني..قلت ابعطيهم رقم جوال صديقي بس عشان افتك منهم..(( تصفق في جمس الهيئة اربع مرات بسبب ترقيمه لتكرونية..والإصرار على نفس التكرونية..المرة تلو الأخرى ..)).. مها : هاهااااااي..انا كنت امشي مادريت الا نواف التمياط جنبي...يبيني آخذ رقمه...رفضت بالأول ..بس خفت انه يتأثر نفسيا..ولا يلعب زين بمباراة الكاس..(( مصطفى ادريس سبق وشرى ببسي من البقالة اللي بحارتهم )).. بندر : يالله عيوني..أنا بروح الحين عندي موعد الوليد بن طلال يبي سلف ..(( مافيه راعي بقالة الا ويطلبه خمسميه )).. مها : وأنا بعد بروح اشوف الخدم والطباخ وش مسوين عشا ..(( أم جيرانهم زارتهم احد المرات ومعها شغالتها واعتبر ذاك اليوم من الأيام التاريخيه ..))..

نستنتج أنه...نصاب + نصابه = صواريخ..ليس لها نظير..

المشهد الرابع ..

الولد اسمه مبارك ويدلعونه فؤاد...والبنت اسمها مبروكه ويدلعونها اريج.. مبارك..صاحب الإبتسامة التي لاتمت للجمال بصلة..ينتظر اتصال صديقته مبروكه..وهم متواعدين انها تدق على الجوال..فهو من الذهانه..كان حاط الجوال على الصامت.. والآنسة مبروكه قاعد ترسله مسجات بالجوال تبي تقوله ادق وأسكر والا ادق وترد علي ..؟ وفي خضم هذه الحالة من الأستدلاخ الجماعي..بين الأثنين..أخيرا قدروا يكلمون بعض..وفي ذلك اليوم واحد من اللي يشتغلون بالأتصالات اغمي عليه من كثر ما اتصل عليه مبارك.. دق مبارك على مبروكه .. مبارك..: عالووووووو ..هلا مبروكه .. مبروكه : هلالالالالالالالالالالالا لالالالا والله....بالطش والرش...مين معي ..؟؟ مبارك : هلا بحياتي وعمري..معك فؤاد سنتر..اللي بكورنيش الدمام ..(( على باله ينكت الحين )).. مبروكه : هلا فؤاد..يابعد عمري..ليه ماقلت لي انه انت حبيبي..يا اللوح ..؟؟ مبارك : حبيت اسويها مفاجأه يا الجنط..(( المشكلة انهم متواعدين ويقول مفاجأه بعد ..)).. مبروكه : الله احلى مفاجأه..بس ابغى اعرف..انت مشتاق لي..والا لا..يعني صج والا كلام..؟ ترى ماحب الكلام..(( ياشين القراوى اذا سمعوا الأم بي سي ..)).. مبارك : ياجعل يصجونك اربع بزارين يلعبون منوبولي .. المهم ترانا على وعدنا.. مبروكه : ايه..نتقابل بسوق الأندلس..؟ مبارك : ايه..انا بروح الحين..للسوق..وانتي اذا وصلتي هناك دقي علي..
انطلق الدلخان..الى السوق..ودقت مبروكه على مبارك.. مبروكه : هلا عمري..شفني انا اللي لابسه اخضر على برتقالي.. مبارك : الله يحوم كبدك وش ذا الذوق الموزنبيقي...انا شوفيني لابس ثوب..سيارتي الحمراء.. نزل مبارك..عند باب السوق الرئيسي..ووقف ورز وجهه..ويدور الأخضر اللي على برتقالي.. واخيرا شافت مبروكه مبارك..وحصل اللقاء العاطفي المفعم بكل ماتحمله كلمات الإشتياق من معنى.. وكان جمس الهيئه قاعد يناظرهم..متكي على الكبوت..يمتع ناظريه بهالمشهد.. وانتهى مبارك..وخشته لاصقه بقزازة الجمس من ورا..ومبروكه بغرفة الهيئه الفرع النسائي..

ومن ذلك نستنتج أن..دلخ + دلخه = جمس الهيئه ..

مما سبق وبأخذ محصلة الطرفين بالوسطين..ينتج المحصله النهائية.. أن أي علاقة تبدأ بالخطأ...لا يمكن أن تكون حب حقيقي أبداُ..مهما كانت الظروف..

**daydreamer** · 15-05-2005, 10:45 PM

..ملكع + دلخه = ضياع مستقبل الدلخه..

...دلخ + نصابه = حالة تطفير تصيب الدلخ..

نصاب + نصابه = صواريخ..ليس لها نظير..

..دلخ + دلخه = جمس الهيئه ..

really very funny mr.x

**زهرة وفى** · 15-05-2005, 10:52 PM

ههههههههههههههههههههههههه هههههههههههههههههههههه

دلخ +دلخ = جمس الهيئه

الله يوسع صدرك كثر ماضحكت

يالله صلاح العطا

**ابوعلي** · 16-05-2005, 02:57 AM

وانتهى مبارك..وخشته لاصقه بقزازة الجمس من ورا..

والله كني اشوفه... ههههههههههههههههههههههههه هههههههه

اضحك الله سنك

**THE DARK MAN** · 16-05-2005, 06:57 AM

thanks alot

**Dr_subahi** · 16-05-2005, 06:58 AM

شكرا Mr. X على ها المواقف المضحكة
وفقك الله
ومنتظرين مواقف اخرى طريفة احلى واحلى ( تقول دعية لمدينة الطائف)

**Abo Lama** · 16-05-2005, 01:48 PM

...يعني لو أطلب منك أي شي تسويه ..؟؟ السلمنه : لو تبين اعطيك ابوي..عادي.. ساره : لا ابيك تسدد فاتورة جوالي...وبس.. وهنا دق مشعل..على خويته ساره...والسلمنه..من الصباحية وهو طاق اللطمه وصاف طابور بالبنك..يبي يسدد الفاتورة..وانواع السعابيل من كثر التفكير بساره..

يعطيك العافيه اخوي مستر مالكم اكس :D

روووووووووووووووووووووووو ووووووووووووووووووووووووو ووووووووووووووووعه

هذا الدلخ يذكرني بتختور معنا في المنتدى رومنسي حيييييييييييييييييييل ومتعذب المسكين

وكل شهر يتعرف على وحدة وانواع السراوات عند البنوك

واخر العهد فيها من يسدد الجوال

:D :D

**Instigator** · 16-05-2005, 03:02 PM

.So cooooooooooooooooool

.Thank you so much

.So, carry on, please

**DR AHLAIN** · 17-05-2005, 12:45 AM

Mr.X

شكراً على هالقواعد المفيدة :D

ابولمى:

يبدو انك ماقربتش ديه عالدمااااغ؟؟؟

اقول رح بس ماعطوك هالبريطانيين وجة جيت للمنتدى.. لا وتتهمني بعد!!!

لكن مشروعي الجديد سجن سياسي ومقرة بروكسل .. :cool:

وماني حاط جدران علشان ماتكتب(تعذيب)

اجل انا امسك سرى عند البنك؟؟ لو قلت الخباز اقول عااادي ;)

**Abo Lama** · 17-05-2005, 01:25 AM

ياحبي لك شكلك زعلت ياعمري وانا داري فيك رومنسي حبتين

ترى والله عشوه في القلوب حق الفيصليه معك

مايعرف الا البخاري والفول<<<<<<<<

بس تكفى لااوصيك بالنوام نبي نقلبهم الى جوارح :D