السلام عليكم ورحمة الله وبركاته
كيفكم ياحلووين
نظراً لكثرة طلبات التقويم المستمر وسجلاته .. أحببت ان اقدم مالدي ..
ان شاء الله تقدرون تستفيدون منه ..
بالمرفقات راح تلاقون التالي ..
1- الغلاف
وهو غلاف تطبعونه وينحط كبداية السجل الرئيسي وسجل المتابعة
2- المقدمة
تنطبع كأول صفحة بالملف
3- متابعة التقويم المستمر
وهذا هو دفتر المتابعة اليومي اللي تحطين فيه ملاحظاتك وتقويمك للطالبة
المهارات مترجمة ومرتبة حسب ترتيب الدروس
الطالبة اللي تتقن المهاره راح نحط لها اكس والطالبة اللي ماراح تتقن راح نحط لها سلاش
طبعاً لو اتقنت الطالبة المهاره من اول شي راح نحط لها اكس بالمربع الاحمر ولو ما اتقنت يصير نحط لها سلاش بالمربعات البيضاء والرمادية لين تتقن المهاره .. طبعاً راح يكون في اوراق عمل وقياس تثبت انك عملتي للطالبه تقويم للمهارة كم مرة لين اتقنت ..
المربعات الحمراء اللي هي مهارات الحد الادنى اللي لازم تتقنها الطالبة عشان تنجح
المربعات الخضراء هي المهارات الاساسيه واللي تعتبر ثانوية بس ماترسب الطالبة
بس احنا كمعلمين لازم نهتم بكلا النوعين عشان طلابنا مايطلعون المتوسط الا وهم متقنين كل شي
طبعاً هالدفتر لك سوي فيه اللي تبي حطي ملاحظاتك على الطالبة لانوو مايعتبر السجل الرسمي حق التقويم عشان كذا بنسميه سجل متابعة يومي
الدفتر عبارة عن فترتين خاص بالترم الاول بس
4- قوائم المهارات للطالبة
ملف اكسل
طبعاً هذا هو الدفتر الرسمي اللي ينرصد فيه مستوى الطالبة النهائي
المهارات مرتبه فيه حسب الدروس ونفس ترتيب الدفتر السابق
طبعاً للترم الاول والثاني
عاد بهالدفتر نكتب نتيجه الطالبة النهائية اتقنت ( اكس ) لم تتقن ( سلاش )
مهارات الحد الادنى عليها نجمه وهي اللي تنجح الطالبة او ترسبها اما المهارات الاساسيه ماعليها شي
مانحط الاكس حق الاتقان الا بعد مانختبر الطالبة وتنجح وتتقن المهارة
لو مااتقنت الطالبة المهارة حتى بعد ما دربناها واختبرناها كم مرة لازم نسوي لها خطه علاجيه ونجتمع مع لجنة الارشاد ونتناقش وضعها يعني ماتحطون سلاش عدم الاتقان الا لمن تستنفذوا كل الوسائل المتاحة امامكم يعني ماترسبي الطالبة الا بعد مايكون حبل الامل فقد منها ..
المهاره تقعد مفتوحه ماتقفليها لو الطالبه ما اتقنتها لان تقويم المهاره يقعد مستمر طول السنة مو بس الترم الاول وبمجرد ماتتقنها تقفليها باكس ..
5- مهارات سادس
هذا ملف انا عملته يلخص المهارات حقت الترم الاول لأولياء الامور عشان يكون عندهم فكرة انا راح اقيم بناتهم على ايش ..
قريتها على الطالبات وشرحتها لهم وخليتهم يدبسوها في اول صفحه في كتاب النشاط
طبعاً اي ملاحظات على الطالبة راح اكتبها على هالورقة او في مفكرة الطالبة
- طبعاً باقي حاجة اخيرة اللي هي
خطة التقويم المستمر .. بس باقي والله ماسويتها .. لانوو للحين مو عارفه كيف اكتبها ..
هالخطه تحتوي المهارات حسب الفترات ونكتب ارقام الدروس المطبقه عليها المهارات ونكتب الاستراتيجيات والادوات اللي راح نستخدمها في تقويم المهارات .. يعني ملخص كامل عن طريقتنا في شرح وتقويم المهارة ..
- طبعاً لازم يكون معك ملف ثابت بالمدرسة تحطين اوراق العمل واوراق القياس فيها وملفاتك ..
اش الفرق بين اوراق العمل واوراق القياس ؟؟
اوراق العمل .. هي اوراق التدريبات اللي نعطيها الطالبات عشان ندربهم على المهارات لين يتقنوها يعني زي زمان كان عندنا ملازم تدريبات ..
يعني لكل درس يكون فيه ورقة عمل وتزيد عددها اذا ما اتقنوا الطالبات مهارة الدرس
يعني بعد مانخلص الدرس نوزع ورقه العمل عليهم يايحلوها في الفصل او ياخذوها معهم البيت على حسب التدريبات يعني ..
اوراق القياس .. زي ورقة الاختبار وهذي الورقة المعتمدة لقياس اتقان الطالبة بحيث نكتب عليها ان الطالبة اتقنت ام لم تتقن المهارة ..
يعني بعد مادربناهم في اوراق العمل نجي نختبر المهارة بورقة قياس ..
يكفي على كل مهارة سؤال واحد فقط وبالورقة الوحدة نقدر نختبر مهارة وحدة او مهارتين بس .. ولازم نكتب اسم المهارة على ورقة القياس واسم الطالبة وتاريخ الاختبار ..
اذا اتقنت الطالبة المهارة نحط لها اكس في دفتر المتابعة واذا لم تتقن نحط لها سلاش ونبدأ ندربها باوراق عمل جديدة لين تتقنها بعدين نرجع نختبرها بورقة قياس جديدة وهكذا ..
عند اخفاق الطالبة في مهارة ما لازم يكون معك اثبات على انك دربتيها كم مرة
باوراق عمل واثبات انك اختبرتيها
باوراق قياس +
خطة علاجية اتبعتيها لمعالجة مستواها +
اعطاء خبر للجنة الارشاد في المدرسة .. لازم يكون عندهم علم بمستوى هالطالبة .. وبكذا تخلي مسؤليتك اذا اخفقت الطالبة في المهارة ...
الاوراق اللي ارفقتها كلها رسمية من موجهات مدينة جدة قسم جنوب شرق ...
اتمنى انكم تستفيدوا واي سؤال او استفسار انا حاضرة ...
مابي منكم الا دعوة صادقة لي ولوالديّ وأهلي ...
ولازم نكون يد وحدة عشان نرقى بالعملية التعليمية عشان تحقق هدفها من التقويم المستمر ..
صحيح ان الطريقة صعبه ومتعبه شوي لانها جديدة بس راح تسهل مع السنين ..
هدف التقويم المستمر هو أن تتقن الطالبة المهارة .. سواء اتقنته في بدايه السنه او في نهايتها اهم شي انها تتقنها والطالبات قدرات وفروق فردية عشان كذا كل طالبة راح تأخذ وقتها في اتقان المهارة ..
صحيح ان الوقت مايساعد وعدد الحصص مرة قليل بس نسأل الله العلي القدير ان يبارك لنا في وقتنا ويجعلنا نبراساً لهولاء الطالبات ..
دمتم متميزين أحبتي
المفضلات