طريق القصيم وصدفة المهندس
كان فيه مناسبـة في القصيم لأحـد الاقارب ..فكنت اسوق السيارة نوعها جي ام سي سوبربان ..
اللون اخضر فاتح بـ فضي
موديل 1995
ماشي 50 ألف ماطقه الشاكوش ...
السعر على السوم <<< معليش هذي معلومات حقت المعارض
هههههههههههههه
(سويت لكم دورة شريطية المعارض)
المهم وانا اسوق تقريباً بنصف الطريق...
وقفنا نصلـي ... ونتقهــوى ونعين من الله خير
ثم حركنا ثانية ...
لاحظت فيه شي اختلف بالسيارة !!
كأنها صارت ثقيلة !!
حسيت كان الفرامل معلق بس قلت ازيد السرعة يمكن تنحـل المشكلة!
وانا مسرع اشوف بالمرايه الجانبية دخاااااااان !!
قلت الله يستر على المسلمين ! <<<مستبعد انه هو
والناس اللي يتعدوني يأشرون لي ..!
حسيت ان الوضع غير مريح !
من ضمن هالسيارات اللي تعدتني سيارة ولد عمي !
واتصل عليه..اول مارد قال:هذا انت اللي بالخط؟
قلت ايه .. والله ويرجع !
سبحان الله هالصدفة وبهالوقت !
الحمد لله توفيق
وانا اللي اوقف ...نزلت
وش اشوف وش اشم ؟!!
ريحة فرامل قوية!
ايه الدعوى تبي توقيف ..
وانزل الفرشة والشاهي والقهوة <<< وسع الصدر !!
الموضوع ماهو بنشر ولا هو كهرب ..!
قلت للوالد الله يحفظة :روحوا مع ولد عمي وانا بدبر نفسي..
رفض وبقوه وقال بنجلس معك ..
كلمت ولد اخوي بالقصيم <<< الي هج من اخوي يوم يضربني
(راجع قصة مطاردات مابعد المدرسة)
قلت له جب معك سطحة
(السطحة) سيارة تنقل السيارات
قال بجيب مهندس واجي....
ايييييه
بعد يمكن ساعة ونص وصل ومعه المهندس...
عاد لزمت على الوالد يمشي هو والاهل مع ولد عمي..ومشوا
عاد المهندس...
دخل تحت السيارة ويفكك ويطقطق وهات مفك اربع طعش..
هات مفك عشرين ..
هات وخذ ..
ما عجبني الوضع ..
كثرت هات ..
وكثرت الآهات !!
اثناء شغله ..
اشوف سيارة (فان)
تمشي مخففه مره!
لما وازنت سيارتنا وقفت!
جاني ولـد صغير
قال يقول ابوي ممكن شوي مويه للسيارة ؟
عاد كان معي جركل مويه كبير يكفي مخيم ههههههههه
واعطيه مويه وراح للسيارة ..
رجعت للمهندس و اثر الوضع متأزم !
الرجال قافله معه يقول عجزت !
مافيه حل الا نشيل السيارة بسطحة!
بهالوقت جا الرجال ابو الولد (صاحب الفان)
يتشكر علشاني عطيته مويه
وشاف المهندس تحت السيارة ..
قال وش عندكم خير ..اقدر اساعدكم ؟
قلت الله يسلمك والله هذا مهندس بس يقول عجز يفك الهوب
قال للمهندس:ممكن تخلين اجرب بعد شوي..
والله وينزل تحت السيارة ...وطراخ طراخ
ويفك الهوب ويضبطه !!
صار احسـن من المهندس!
قلت ماشا الله عليك عندك خبره ..
قال:انا مهندس متخصص بالامريكي وعندي ورشة في المكان الفلاني !!
وسيارته تعطلت وهو راجع للقصيم ..
طبعا بعد هالمعروف اللي سواه فيني مشيت وراه مسافة طويلة لان سيارته ماهي مضبوطة ...
وتعطلت ثانية ..عرضت عليه يركب معي هو وعياله ورفض
وقال خال العيال جاي ياخذهم وانا بحمل السيارة..
انتظرت عنده حتى وصل خال عياله ..
وكملت طريقي وانا مستغرب!
سبحان الله
تعطلت السيارة بوقت بمرور ولد عمي
الرجال تعطلت سيارته عند سيارتنا واحتاج للمويه اللي هي معنا
المهندس جا من القصيم ماعرف للسيارة
وماعرف لها الا صاحب السيارة المتعطله
والصدفة انه متخصص بالامريكي !
حمدت ربي وشكرته والا كان السالفة تطول
و وصلت معكم الى نهاية حلقات قصصي والله رجعتني
يافاتح القدس
لأيام زمان
واعتذر على الاطالة والحقيقة اني مستحي منكم جميعاً وخصوصاً اخوي فاتح القدس ..احسن اني رفضت اطلق هالموضوع ...كأني لاعب رفض تبديل المدرب <<<يحب الامثله
واشكركم على حسن الاستماع
واختار ..
اختار ...
اخ تار ؟؟
بعد شوي اعلمكم
المفضلات