تتفاوت اهتمامات الأشخاص ..
فبالنسبة للنواحي العلمية ..
واحد يهتم بالتاريخ واحد مهتم بالرياضيات واحد مهتم بعلم النفس وواحد وواحد وواحد ..
أما الكتب .. ففي المهتم بالكتب العلمية أو الكتب المفيدة اللي ترتقي بفهمه وعقله وتفكيره .. وفي المهتم بالكتب والروايات السخيفة اللي ما تزيده رقي ولا شي .. وبالعكس تحط من فكره وعقله ..
نيجي للأشخاص ..
ففي اللي يتتبعوا أخبار الصحابة رضوان الله عليهم ،، الفاتحين ،، الأبطال المسلمين ،، العلماء المسلمين ..
وفي اللي يتتبعوا آخر أخبار المتعوس مدري مين ،، والمفطوس وأصحابه والخبلين ..
فزي ما تنوعوا الناس اتنوعت الاهتمامات ..
بس !!!
إنك تلاقي بين كل 20 من شبابنا نص واحد <<< أما نص واحد دي متعوب عليها >>> يهتم بالمواضيع اللي يرتقي بيها عقله وفكره ...
تلاقي واحد بين كل 20 يعرف عظماء سطرهم تاريخنا بالذهب !!!
في ناس لمن تقولي كده مستغربة .. تقولك : طيب والمشكلة ؟!!!!
المشكلة ؟!!! تسأليني عن المشكلة ؟!!! اسأليني ايش المصيبة !!!!!!
لمن احنا .. واحنا أبناء دي الأمة وعمدها ما نعرف تاريخنا ولا الأشخاص اللي بنوه ؟؟؟؟
أجل مين هما الأشخاص اللي احنا نبغى نسير في دربهم لبناء تاريخ جديد ومشرق للأمة ؟؟!!!
لمن احنا أبناء أمة اقرأ ... أكترنا يقرأ أشياء ما ترتقي بعقله ولا بفكره ؟!!!
أجل كيف نبغى نرجع ؟؟؟ وكيف نبغى نعمل ونسوي ونرتقي واحنا ما ارتقينا بعقلنا اللي هوا أهم شي !!!
وفي البعض ينسى تاريخه ومجده وتاريخ أجداده وأبطال أمته ويروح يجري ورا ( ايش عمل نابليون وايش سوا رتشارد وايش فعل القيصر ) طيب أهم من دولا المتاعيس كلهم انك تعرف مين هما أبطال أمتك !!!
أبطال أمتك ما اقتصروا بس على اللي زمان.. لا.. ما زال في أبطال حتى في عصرنا هدا ...
في من عاصرناهم وماتوا رحمة الله عليهم وفي من عاصرناهم ومازلنا نعاصرهم ..
أبطال وأي أبطال ..
نيجي لتاريخنا .. في كتيرين ما يعرفوا شي عن تاريخنا وقضايانا ..
يعني كيف تبغونا نتعلم من أخطاءنا القديمة .. كيف تبغونا نرجع زي ديك الأزمنة إذا احنا نفسنا ما نعرفها ..
طيب فين الغلط ..
فينا ؟؟؟ إننا ما بنقرأ المفيد ؟
ولا في مؤلفي الكتب والروايات السخيفة ؟
اتزكرت في آخر مرة رحت فيها مكتبة جرير .. رحت لقسم الروايات .. اختفت أو خلينا نقول تلاشت الروايات اللي لها هدف سامي .. إلا كم وحدة يتعدوا على الأصابع .. ليش ؟!
هل هذا ما يطلبه القارؤون ؟!
ومضة ..
فلنرتقي بعقولنا .. ولنرتقي بكل أمر يتعلق بنا .. تفكيرنا .. كتبنا .. اهتماماتنا ..
مع تحيات..
حملة لنرتقي بجيلنا
( أخلاقنا .. قيمنا .. مبادئنا .. إسلامية)
المفضلات