افيدوني مو عارفة كيف اتصرف

**الكعبةقبلتي** · 09-03-2011, 01:37 AM

السلام عليكم ورحمة الله وبركاته
يااخواتي انا ابغى منكم انكم تشوروا علي كيف اتصرف بموضوعي انا مدرسة انكليزي توظفت السنة هذه بعد عدة سنوات من التخرج جالسة في البيت واول مرة اتوظف في حياتي مشكلتي ان من اول يوم دخلت على طلابي تبسمت معاهم واعطيتهم وجه وايضا تلعثمت في الكلام واحس من يومها والطالبات استهانوا فيني وكمان ان في طالبة كانت في مدرسة امريكية وشايفة حالها شويتين كل شوي تحاول ان تخطئني وتعمل حالها فاهمة وباسلوب غير لائق بالمرة حتى طريقة جلستها في الفصل غير منتظمة وانا موعارفة كيف اتصرف معاها
اليوم حاولت استفزازي وقلت لها لاتحاولين ان تخطئيني لاني متاكدة من كلامي وبلغتها اني مااحب ان تتكلم معي بالطريقة هذه وبعدها رحت وبلغت الوكيلة وقلت لها تراني متاكدة من المعلومات التي اقولها داخل الفصل والطالبة هذه دائما تحاول ان تتدخل بالدرس وطريقة شرحي وبصراحة بعد ذلك توترت لاني خايفة انها تحاول تشويه صورتي امام الادارة وكمان مو عارفة كيف اتصرف معاها بعد دخولي الفصل
انا حاسة ان كل الفصل مستهين بي ومو عارفة كيف اتصرف
فكرت اني اترك العمل لكن والله والله اني محتاجة الوظيفة هذه بشكل كبير والله يعلم بمدى حاجتي لها
فأفيدوني يالغاليات كيف اتصرف في الموضوع
ولكم الاجر واسأل ربي ان يفتح ابواب رحمته لكل من تساعدني
وجزاكم الله خيرا

**غدي الحلوة** · 09-03-2011, 02:13 AM

اووووووووووووووووووووووة نو نو NO WAY

حياتي انتي ... خلك واثقة من حالك مو معقوله تتركي التدريس المهنة اللي اكيد تعبتي فيها و تحبيها عشان حتة بت لا راحت ولا جت ولا وتقطعي رزقك ورزق عيالك مو مصدقه انا مستحيل

شوفي لو كنت مكانك .... اول خليك واثقة من حالك و حضري الدروس كويس بالمرة كويس ولو اكثر من مرة و تدربي على طريقة سير الدرس ..... ولا تعطي البنت اياها اي اهتمام و اذا تشاطرت بزيادة و عاندت ممكن تجلسي و تقولي لها ايش رايك تشرحي لنا الدرس باسلوب مرح وكانه عااااااااادي وخليها هي تجرب وضعك لكن انتبهي خليك مرحه مو جامدة معاها عشان ماتفتكر الموضوع شخصي

والله يوفقك

**الكعبةقبلتي** · 09-03-2011, 04:16 AM

ربي يوفقك يااخت غدي ويجعل كل حرف كتبتيه في ميزان حسناتك
بأخذ بنصيحتك أن شاء الله لكن عندي سؤال لو تشاطرت يعني اتركها تشرح الدرس ولا بس اقول لها كذا انها تجي مكاني تشرح الدرس حتى تحترم نفسها
انا اللي قاهرني ان اسلوبها في الكلام معي غير مؤدب
بنتظر ردك يالغلا
وجزاك الله خيرا يالغلا

**غدي الحلوة** · 09-03-2011, 07:27 AM

لا ما اظن راح تقدر او عالكثير راح تتفاجاء

لكن اعطيها ثلاث دقايق تعيش الوضع و بعدها ما اظن تكرر فلسفتها

والله يوفقك

**ترآتيـــل سَمر** · 09-03-2011, 01:39 PM

وعليكم السلام ورحمة اله وبركاته

اولا الف مبرووك الوظيفه الجديده وجعلها الله فاتحه خير عليكِ

ثانيا شي طيب جدا انك واثقه من المعلومات اللي تقديمها مع انك منقطعه فتره عن اللغه.. هذا بحد ذاته نجاح ..

ثالثا .. مشكلتنا دائما نعطي المواضيع اكبر من حجمها ونرسم حواليها دائره كبيره غير موجوده اصلا الا في خيالنا .. وهذا اللي يخلينا نتأثر سلبيا مما حولنا ..

يعني انتي مثلا تستفزك البنت وتخليك تحسي ان الفصل كله مستهين فيك مع احتمال وجود بنات مقدرينك ..

تجاهلي البنت تماما واعتبريها مو موجوده بالذات انها من النوع الغير خلوق حسب كلامك وحاولي تثنين على زميلاتها ممكن يسبب نوع من الغيره اللي تدفعها للأحسن ..

حاولي ماتجادليها كثيير .. ولاتردي عليها .. عشان ماتحس بأهميتها كلامها..

دائما كوني واثقه من معلوماتك ولا تعطيها مجال للتشكيك فيك وتظاهري الثقه في اسلوبك .. وخلي الحصه كلها شرح لاتعطيهم فرصه للكلام حتى تعريفهم زين..

اخيرا احب اقولك ان اول تجربه لازم تكون صعبه وتحتاج منك شويه صبر وثقه

وفقك الله واعانكِ

**just - me** · 10-03-2011, 02:31 PM

عزيزتي ... انتي ارتكبتي غلط في البداية كونك استخدمتي اسلوب الين و كسر الحواجز دون ان تتعرفي على نمط طالباتك فللاسف بعض الطالبات لا تنفع معهم اللطافه اطلاقا كونهم يحملون نوع من التمرد وحب اثبات الذات داخلهم لكن انتي بالطبع تعاملتي معهم بحسن نية لذا لاتلومي نفسك وانسي بداياتك ونصيحتي لك ان تسترجعي ثقتك بنفسك باي شكل من الاشكال لانها مفتاحك الوحيد والقوي لحل المشكله ثم ان الطالبه مهما صغر سنها تستطيع ان تشعر مااذا كانت معلمتها قويه من الداخل ام لا ادخلي الصف ببتسامة ثقه واي حركة سخيفه من طاباتك عالجيها بنظرة عتب اولا ثم تجاهلي الموقف اذا كان ممكن لك ذلك فالتدقيق في كل تصرف يربكك ويسعد طالباتك المستعدات لاثبات قوتهن واضحاك الصف اذا استوقفتك وخطأتك اشكريها لانها فعلت ذلك قولي لها مثلا عبارات تشجعها و تحرجها في نفس الوقت مثل " اشكرك جدا ..اجمل مافي الحياة ان يتعلم المعلم من تلميذه " وتعلمي فن ظبط النفس والتمثيل بان شئ لم يكمن... لذا الثقه ثم الثقه ثم الثقه وتستطيعين مثلا ان توقفقي اي مهزله في الصف بكلمه مثل "انتي اضحكتي الجميع اشكرك على ذلك لكن تاكدي انه سياتي يوم ويضحك الجميع على موقف فعلتيه وحينها ستعرفين انه من اسوء الطباع الضحك على شي لايستحق الضحك"

**الفجر الجديد 2** · 10-03-2011, 04:27 PM

لالالالالالذي الدرجه تتركين وظيفتك شوفي انتي اهم شي حضري الدرس زييييييين مرات عديييده وكوني واثقه في نفسك ولاتحاولين تحسسين الطالبه اوغيرها من البنات ان انتي متردده او مرتبكه وحاولي تكسبين البنت في صفك لاتكونون ضد بعض سوي لهم حركه طلعي طالبات يشرحون واختاري لها اصعب شي وخليها تشرح عشان يبان ضعفها قدام الفصل والله يوفقك

**قوية قلب** · 12-03-2011, 03:44 PM

والله نفس المشكلة اللي عندي....

بس انا قلت في نفسي لو تركت الوظيفه عشانها معناها ان انا ماقدرت احل ابسط عائق يواجهني وهو الطالبة نفسها.....قررت اني من بكرة رح اخليهم يطلعون يشرحون مثلا قاعدة ولايقل الشرح عن 5 دقايق.... ورح اطلب من زميلاتها يقيمونها معاي.... بكذا رح تحس بتعب الوقفه وتشوف الموقف بعينها...
نصيحتي لا تتركين الوظيفه ولاتعطين هالبنت اي اهتماام لأن في زيها كثير...
وبلغينا ايش صار معك؟

**فايز 2000** · 14-03-2011, 08:47 PM

اهم شي للمدرس او المدرِسه ( الثقه بالنفس ) و (عدم اعطاء الطالبه وجه اكثر من اللزوم )

هذا مو معناته تكبيتينهم داخل الفصل لا بالعكس كل ماكنتي متفتحه اكثر كل ماتقبلوا منك اكثر

وهذا كله ( بحدوووووووووووووووووووووو وووووووووووووود )

**The Consellor** · 16-03-2011, 01:40 AM

حبيبتي..أولاً أبارك لك الوظيفة الجديدة..أسأل الله أن يجعلها فاتحة خير عليك وخطوة تقدم وازدهار لك وعون لك على الطاعة..وعقبال جميع المحتاجين يارب
ثانياً:قلبي الوظيفة فرصتك لإيصال رسالتك الدينية والدنيوية فالمعلم قدوة فممكن تكوني سبب في فتح طريق النجاح لمجموعة من الطالبات..
ثالثاً:لسا حبيبتي أنتِ مازال بإيدك فرصة وما انتهت الدنيا هنا..كل إنسان يخطي لكن العاقل اللي يتعلم من أخطاؤه..
..قبل كل شي خلي همك الأكبر رضا ربك ثم ابدئي بمعالجة المشكلة من حيث بدأت..
الخطوة الأولى:ادخلي عليهم اول حصة من الآن يعني من بكرى وخليك جادة وعطيهم قوانين ولو كان الوقت متأخر وطبعاً خلي كل قانون يترتب على مخالفته نقص درجتين أو أكثر يعني مثلاً: تتكلمي بالحصة نقص درجتين بالإضافة إلى الطرد خارج الفصل، تتكلمي عربي نقص درجتين بالإضافة إلى تكرار الجملة اللي قلتيها بالعربي 10 مرات مثلاً بس مو بالعربي تكتبينها بالانجليزي وتكررينها وتجيبيها الحصة الجاية ولو ماجبتيها يتضاعف التكرار إلى عشرين وهكذا ، تناقشي الاستاذة بشي انتي مالك علم فيه أو تتعمدي تخطأي الاستاذة طرد من الفصل و نقص 4 درجات وتكلف بشرح درس جديد إجباري وشرح حلو مع وسائل وتعب ولو ماسوت هالمهمة تضاعفي الدرس إلى درسين..وطبعاً كل حصة عطي طالبة تثقين فيها قائمة الأسماء(وسوي خانة معينة للمخالفات) واطلبي منها تضع اكس عند الطالبة اللي تشاغب او تعمل اي مخالفة..وقوليلهم ترى اللي يكون عندها علامة اكس في المخالفات أحطها في بالي حتى وأنا أصحح في الامتحان..يعني سلوكك بالفصل هو اللي يحدد مراعاتي لك بالامتحان..<<وطبقيها عشان مايكون مجرد كلام وهكذا وخليك جادة و قولي ببساطة احنا هدفنا نتعلم اللغة مو نلعب وكل حصة تدخلي ذكريهم بالعبارة هذي:اللي ماعندها استعداد تتعلم تتفضل برا أنا ما أجبر أحد على الحضور..لكن انا ماحد يستهتر بحصتي او ينام او يتكلم..اللي ماتشوف نفسها قد المسؤولية وقد الأمانة تتفضل..<<طبعاً كل هذا راح يثبت قوتك وجديتك وحزمك
و تثقفي بمادتك بشكل جيد..بعدين تثقفي ثقافة عامة قدر الإمكان وخاصة بجوانب التطوير وكيفية التعامل..صدقيني كل ماتزيد ثقافتك تزيد هيبتك واحترامك من قبل طالباتك..وقبل كل شي خليك واثقة من نفسك..ولاتدققي بكل شي..وحاولي تتقبلي الأمور برحابة صدر وتستخدمي ردود ذكية تحرج اللي يحاول يستفزك وأنتِ مرتاحة وتتكلمي بكل ابتسامة..
يعني مثلاً: لو لاحظتِ وحدة من طالباتك تعمدت تخطأتك قولي مثل ماقالت أختي just me الله يعطيها العافية: (ِشي جميل إنه المعلم يتعلم من طلابه..احنا كلنا طلاب في مدرسة الحياة..أنا أعلمكم وأنتم تعلموني..بس أهم شي نتأكد من المعلومة اللي حابين نوصلها..أنا واثقة حبيبتي إنك فاهمة صح بس يمكن مو قادرة توصلي معلومتك..تراها وصلت وأقدِّرْها..وهي نفسها المعلومة اللي أنا قلتها..برافو عليك ماخاب ظني فيك..كنت حاسة إنك قدها..أنتِ ماشاء الله عليك واضح عندك مهارة بالشرح فعشان كذا راح أكافئك بشرح درس جديد أنا ماشرحته عشان أثبت لزميلاتك إنك قدها وقادرة تشرحي درس جديد ماشرحته الأستاذة )<<طبعاً هذا كنوع من العقاب لها لكن بأسلوب غير مباشر يعني لما تسمعه تحس إنه تشجيع لها يعني مثل مايقولوا أسلوب ذم بما يشبه المدح ..ولو شفتي إنها خافت وارتبكت ورفضت تشرح..قوليلها مو إنتي اللي ماتقبلي التحدي..عهدي بك شجاعة..وهكذا بعدها راح تحس إنه هذا اهتمام منك فيها وصدقيني بعدها راح يتحول عداء الطالبة لك إلى محبة وراح تنبهر بحسن تصرفك وروعة أسلوبك..وراح تهتم بمادتك وتحترمك وتهابك أكثر..
بعدين إذا شفتِ إنها تحسنت علاقتها فيك خلاص احترميها وشجعيها وقدري جهودها ولو كانت قليلة..
أهم شي لاتبدي استيائك من التصرفات المزعجة لبعض الطالبات خليك ريلاكس ومايهزك ريح وثقتك قويها ومثل ما اتفقنا على الردود المنطقية الذكية وحسن التصرف والتعامل مع المواقف..
واحذري الصراخ قدر الإمكان تراه مايجيب فايدة..ولاتتساهلي معاهم عشان مايكسروا الحواجز..
تقدرين تصلحين اللي انهدم بس لاتعيدي هدمه ثانية..أهم شي يبقى لك هيبة بقلوب طالباتك..
ولاتنسي الأنشطة والأشياء الإبداعية بالحصص عشان صدق ينبهروا وكل حصة عطيهم معلومة إضافية تتناسب مع الدرس أو مو شرط تتناسب بس اهم شي عوديهم على المعلومات الإضافية اللي تزيد هيبتهم واحترامهم لك وياليت تكون المعلومات الاضافية مرتبطة بالمادة عشان تثبت لهم إنك متمكنة..وممكن تكون هالمعلومات بالقرامر أو النطق أو الترجمة أو أي شي من مجالات اللغة الانجليزية..
وأهم شي خلي حصصك حماس وسوي لهم أنشطة وخليهم يشرحوا ويقيموا بعضهم وأفضل وحدة تشرح كافئيها بالطابور بهدية قيمة وقولي إني سويت مسابقة أفضل معلمة انجليزي للمستقبل واللي حازوا على هاللقب وأتوقع لهم مستقبل ناجح هي فلانة وفلانة ووو...إلخ
ولاتنسين التشجيع تراه مهم جداً جداً وكثير معلمات يغفلون عنه..ونمي مواهب طالباتك بالمادة..
سوي لهم نشاط كتابة باراقراف أو قصة قصيرة أو عطيهم مقطع يترجموه..
سوي لهم ألعاب انجلش تنمي المهارات عندهم طبعاً بالحصص نفسها مافيه مانع نلعب ونتعلم..
خلي حصصك منافسة مثل الدورات قسميهم قروبات مثلاً وكل قروب عطيهم سبورة بيضاء صغيرة أو ورقة يسجلون فيها النقاط اللي يحصلون عليها خلال الدرس<<حسب مشاركتهم يعني كل ماتشارك وحدة من المجموعة يحصلون نقطة ويسجلونها عندهم طبعاً وحدة تكون القائد عليهم
وبعدين المجموعة الأكثر نقاط هي اللي تفوز..وكل حصة خوذي معاك هدية بسيطة لو علبة تشوكليت للمجموعة اللي تفوز..صدقيني راح تكون حصصك جنان
بس أنتِ اجزمي وجربي..
اهتمي بطالباتك..عطيهم الحب والاهتمام..اسألي عن اللي غايبة منهم..واللي ماتشارك بالحصة لاتجبرينها تجاوب ولاتحرجينها وبعد الحصة ناديها وحطي يدك على كتفها وتكلمي معها بكل اهتمام وحب قوليلها مثلاً<<عسى ماشر حبيبتي اليوم شعلتك طافية وتراني حاسة فيك وماحبيت أحرجك وأقومك بالغصب قدام زميلاتك..عشان كذا ناديتك..فيك شي حبيبتي أقدر أساعدك عادي أنا أختك..ولو قالت مافيني شي بس مصدعة مثلاً قولي ترى مشاركتك تهمني أتمنى تكونين شعلة الحصص الجاية..بانتظار حماسك..
صدقيني بعدها راااح تطيييييييير من الفرحة وخليك كذا مع كل طالباتك ولا تهتمين بأحد دون الآخر ترى هذا أسوأ سلوك..أظهري لهم جميعاً حبك واهتمامك ولاتحطمينهم مهما كان ترى بناتنا بحاجة إلى اهتمام شوي..صدقيني راح يسوون كل اللي تبغين وأكثر بدون نقاش وراح يتلهفون على حصصك..
وشجعيهم على المحاولة بأي شكل قوليلهم يكفيني إنك تحاولين إذا حاولتِ معي راح أعطيك درجات مثل اللي يشاركون صح..أنا ماتهمني صحة الإجابة..أهم شي نحاول..والتعلم يجي بالمحاولة والخطأ..ولو وحدة حاولت وأخطأت لاتقولي لها خطأ ترى هذا اللي يحطمهم..قولي محاولة رائعة ممتاز لكن أبغى الإجابة الدقيقة مين العبقرية اللي راح تجيبها..صدقيني العبارات هذي تترك أثر كبير وتشجعهم على الإنجاز..

حاولي تحتوي دروسك على أشياء غريبة و إبداعية تجذبهم
مثلاً سوي مقدمة للدرس بشكل قصة ويكون معك وسائل توضح لهم ايش تقولين
مرة ابدأي درسك بلعبة وهكذا...يعني أمامنا عدة طرق لجذب الطلاب وامتلاك قلوبهم بس احنا نغفلها
وشي مهم بعد لو حسيتِ إن طالبة تحبك وتزين لك دفترها شجعيها واشكريها على اهتمامها أمام زميلاتها لاتسهجيها مثل بعض المعلمات الله يهديهم..واكتبي لها عبارات مميزة تميزها عن غيرها
وإذا جمعتِ الكتب أو الدفاتر لاتكتبين عبارة وحدة للجميع لا نوعي في العبارات حسب جهودهن يعني كل وحدة واللي تستحق لاتساوين اللي حالة الواجب أي كلام باللي حالة صح ولاتساوين اللي مرتبة دفترها وتعبانة عليه باللي بس يادوب تكتب الملخص..وعلى فكرة ترى الطالبات يهتموا بعبارات التشجيع خاصة بالانجلش من باب إنك تعلميهم شي جديد من خلال العبارات الجديدة عليهم مو التقليدية وبنفس الوقت تشجعيهم وحاولي تكتبي عبارات جديدة وغريبة ولو سألوك عن معناها قولي راح اترك معناها لكم أنتم تبحثون فيه واللي تجيب المعنى الصحيح لها درجة مثلاً..وبكذا تنمي عندهم مهارة الترجمة يعني الآن ضربتي 3×1 (تشجيع وتعلم عبارات جديدة وترجمة)
سوي لهم بطاقات تشجيعية لكل وِحدة <<مثلاً الوحدة تحتوي 8 دروس يعني كل درس له بطاقة
واللي تجمع بالوحدة 8 بطاقات لها تكريم خاص بعد ماتنتهي الوحده
خلي فيه فاصل بين كل وحدة ووحدة يكون فيه مراجعة للوحدة وتكريم للي جمعوا بطاقات الوحدة
واللي راجعوا الوحدة زين
دائماً شجعيهم على الطموح والتفاؤل والنجاح حسسيهم إنهم متميزين
قوليلهم كل وحدة منكم متميزة عن الثانية بشي معين..ربنا خلقنا متفاوتين بكل شي وكل واحد عنده مزايا بشخصيته لازم يستغلها عشان يثبت تميزه ويطلع فوق..افتحي لهم الطريق للنجاح
قوليلهم أبغى طالباتي أسماء لامعة في سماء النجاح..أبغى أشوفهم بعد سنوات بالقمة..عشان أفتخر إني درستهم يوم من الأيام..
وأهم شي اربطي المادة بالدين وأخلصي في عملك صدقيني تكبرين في عيونهم وتتركين بصمة رائعة في قلوبهم..
والله يوفقنا وياك أختي..آسفة طولت بس حبيت أفيدك من خبرتي
بس أهم شي جربي اللي قلتلك هذا وارسمي خطة جديدة مادامك لسا في بداية الترم..
وأتمنى تتواصلي معاي على الخاص وتبلغيني عن أخبارك مع التجربة...
ولاتنسيني من دعواتك حبيبتي بتيسير أموري وتحقيق أمنياتي..
محبتك:
The Counsellor

**الكعبةقبلتي** · 17-03-2011, 03:26 AM

اختي في الله The Counsellor جزاك الله خيراً
نصائحك بحتفظ فيها في ملف خاص وبطبقها بأذن الله سائلة ربي ان يكتب لك بكل حرف الف حسنة يااختي
وانا الحين دخلت النت بقول ماحصل معي وشفت ردك يااختي الغالية وفعلا بشكرك لمساعدتي وبشكر كل من ساعدني وكتب لي النصيحة ربي يجزاكم الخير جميعاً يااخوتي ,انا تصرفت كما نصحوني اخواتي في الله واللواتي زرن موضوعي وتصرفت مع البنت باني تجاهلت تعليقاتها ولكن هي تمادت اكثر بحيث لما جيت اشوف الواجب للطالبات رمت الدفتر علي بطريقة غير لائقة وبعد ماصححته خذته مني بطريقة اتعس من طريقة اخذه وانا تجاهلت الموضوع لكني منزعجة كثير من تصرفها
ومازالت تعلق تعليقات سخيفة اخرشي اليوم سالتهم سؤال عن الدرس تقولي انت فضولية كثير تسالين انا انفعلت قلت لها السؤال في الكتاب وهو سؤال الكاتب فهل انت تقصديني او تقصدين الكاتب فهي حست من كلامي اني عصبت فقالت لالالا قصدت الكاتب
تعبت منها ربي يصلحها ويهديها ويصبرني عليها
واسأل ربي ان يفتح ابواب رحمته لكل من ساعدني في موضوعي وجزاكم ربي كل الخير

**ام عسااف** · 17-03-2011, 07:00 AM

الله يعيييييين

**The Consellor** · 17-03-2011, 07:14 PM

حبيبتي مادام ماينفع فيها التجاهل لاتجاهلينها
بالعكس استخدمي معاها الجد وخليك صارمة معاها وطبقي عليها قوانين وخسف بالدرجات
يمكن يردعها..وإذا تلفظت عليك وتمادت معاك قولي (ماراح أرد عليك لأن كرامتي ماتسمح لي أكلم ناس أمثالك..وتراك تعكسين عقليتك..تصرفاتك مو تصرفات إنسان واثق من نفسه)
يمكن يفيد مع أشكالها..
وصلي بالليل وادعي لها بالهداية ولاتيأسي من رحمة ربك..
وأي حل من الحلول المقترحة مايفيد معاها اتخذي حل غيره..
والله يصلحها ويفتح على قلبها..

**بيلسآآن** · 19-03-2011, 04:18 AM

شوفي يااختي ,,

انا ماراح ازيد كلام اللي قبلي كفوو ووفو ,,,

انا اللي بقوله ان البنت ذي اللي دارسه بمدرسه امريكيه ومسويه فيها فاهمه ,,,

ااذا تكلمت وانتي تشرحين قوميها تشرح الدرس كامل وخليها لين تنتهي الحصه وطبعا لا تكلمينها الا بالانقلش ولا تنطقين معاها عربي ابد عشان تعرف تحترم اللي اكبر منها .. وانا متاكده ما عندها ما عند جدتي بس كذا عشان توري زميلاتها انها فاهمه وما يحتااج لها تدريس ,,

الله يوفقك ويسعدك وعلمينا وش يصير معكـ ..

**غدي الحلوة** · 19-03-2011, 05:03 AM

The Counsellor

كلامك اعجبني كثير

يعطيك العافية

**bigevil** · 19-03-2011, 07:10 AM

انا اعطيك الحل ..

انا كان عندى طالبين امهم امريكية .. وكمان عندى واحد مصري لغته ممتازه جدا وكانوا مسوين لى زحمه وقليلين ادب .. اول شي سويته طرتهم من الفصل وطلبت اولياء امورهم .. وجونى اهلهم وقلت لهم باللعربي الفصيح يا اولادكم يتربون ويتعلمون يا ما بيصير طيب .... وفى الحصه الغيتهم نهائيا لا مشاركه ولا اعطيهم وجه ولا انكت معهم ولا كانهم موجودين اساسا .. وارزعهم بإختبارات صعبه جدا . واذا فكر احد منهم يسألنى اطلعه غبي واضحك عليه الطلاب .. وبعدا فتره من المعامله السيئه اصبحوا طلاب مؤدبين وشطار مرره .. وصاروا فى قمه الادب عندى .. بالعربي الفصيح ادبتهم مضبوط .
وترا مافى شي يربي مثل التجاهل بالحصه يقتل تماما .. مره كان عندى سؤال محد جاوبه وبقى المصري لوحده رافع يده والتفت يمين يسار وقلت ما دام محد يعرف انا بجاوب .. واجاوبه انا وهى بغا يتشقق من القهر .. وسويتها فيه اكثر من مره وبعدها صار بحصتى بدون صوت نهائيا ..
وفى طالب السنه ذي قبل شهر مزعج ووقع وقليل ادب مع المعلمين واكتم نفسه بالحصه عندى ما يتكلم ولا يجاوب ولا اسمع له صوت ..بس دوب ينطق او اسمع صوته طوالى التفت له واصيح واقوله لا اسمع صوتك يا معتوه . ولا اخليه يتنفس حتى لما يضحك الطلاب واشوفه يبتسم اطالع فيه بغضب واقوله لا تضحك انت .. ونكدت عليه حياته .. ورب الكعبه الان هو افضل طالب عندى خلقا لدرجه ان ابوه جانى قبل شهر من الان وقالى انت ليش ما تعطي الولد وجه قلتله ربي ولدك اول شي وبعدين تعالى ناقشني وجلس يتحايل على يقول ذا صغير ومدرى ايش وانا فى فى خاطري قلت طيب والا لاعلمه اصول الادب اللى انت ما عرفت تعلمه اياها .. وشوفيه الان قمه بالادب فى حصه الانجليزي بس وصار يحل واجبات ويشارك بالحصه ..بس بعد ايش ..

هذي تجاربي اللى حصلت معى وكلها نتيجتها ان الطلاب صاروا قمه فى الادب بالحصه .. وانت بكيفك خذي منها اللى ينفع معاك

**Romanciah** · 19-03-2011, 08:22 AM

المشاركة الأصلية كتبت بواسطة الكعبةقبلتي

اختي في الله the counsellor جزاك الله خيراً
نصائحك بحتفظ فيها في ملف خاص وبطبقها بأذن الله سائلة ربي ان يكتب لك بكل حرف الف حسنة يااختي
وانا الحين دخلت النت بقول ماحصل معي وشفت ردك يااختي الغالية وفعلا بشكرك لمساعدتي وبشكر كل من ساعدني وكتب لي النصيحة ربي يجزاكم الخير جميعاً يااخوتي ,انا تصرفت كما نصحوني اخواتي في الله واللواتي زرن موضوعي وتصرفت مع البنت باني تجاهلت تعليقاتها ولكن هي تمادت اكثر بحيث لما جيت اشوف الواجب للطالبات رمت الدفتر علي بطريقة غير لائقة وبعد ماصححته خذته مني بطريقة اتعس من طريقة اخذه وانا تجاهلت الموضوع لكني منزعجة كثير من تصرفها
ومازالت تعلق تعليقات سخيفة اخرشي اليوم سالتهم سؤال عن الدرس تقولي انت فضولية كثير تسالين انا انفعلت قلت لها السؤال في الكتاب وهو سؤال الكاتب فهل انت تقصديني او تقصدين الكاتب فهي حست من كلامي اني عصبت فقالت لالالا قصدت الكاتب
تعبت منها ربي يصلحها ويهديها ويصبرني عليها
واسأل ربي ان يفتح ابواب رحمته لكل من ساعدني في موضوعي وجزاكم ربي كل الخير

مرحباً أختي...

التعامل مع الطالبات يحتاج إلى الكثير من التمرس و الصبر و الخبرة...

قرأت الموضوع كله و الردود المتتابعة...

ولكن أسمحي لي بنظري لم تتجاهليها بالشكل الكامل! يفترض حين سلمت الدفتر بطريقة غير لائقة كما أوضحتي، أنكِ تجاهلتيها و كأنكِ لم تريه و لم تصححيه حتى...

بالمختصر المفيد، أستعيني بالله عند دخولكِ الفصل و جربي التجاهل لمدة أسبوع لانه بعض الطالبات ماشاء الله نفسهم طويل... خليكِ هادئة قد ماتقدري ومبتسمة و تجاهل تماماً وجودها و النظر لها أو حتى انك تستمعي تعليقاتها و لا تتوقفي بالشرح لو سمعتها. ولو لاحظتي أحد الطالبات تحادثها فليكن توبيخك لمن تحادثها.

تجنبي النقاش معها كـ أن تقولي أنا متأكدة من معلوماتي وماأإلى هذا السجال الذي لا نهاية له إلا أن يهز ثقتكِ بنفسكِ أمامهم و يشككوا بقدرتكِ و يستغلوا الفرصة، و تجنبي أيضاً الفاظ السب و الشتيمة فهذة أولاً ليست أسلوب تربوي و ستوقعك بالمسألة حين تكوني تربوية و تتعاملي هكذا.. خاصة لو كنتي بديلة أو بمدرسة اهلية!!

صدقيني أسبوع من التجاهل التام لهاا لا حصة أو حصتان سيخرج لكِ بنتيجة طيبة بإذن الله...

ويفضل أن تحاولي جذب طالباتك للدرس بإستخدام طرق التدريس الحديثة و تعزيز المتميزات منهن ستلاحظي خلالها إختلاف وضعكِ به...

مــوفقه و اعانكِ الله...

**الكعبةقبلتي** · 19-03-2011, 03:10 PM

السلام عليكم ورحمة الله وبركاته
جزاكم ربي خيرا يااخواتي ماكصرتوا معي وانا فعلا بمشي على نصائحكم ومطبقتنها لكن البنت هذه مابينفع معها
انا كأني بترك الوظيفة من البنت هذه يااخواتي استفزازها موطبيعي
عملت زي ماقلتوا لي وتجاهلتها قسماً بالله لوتشوفوا منظرها وانا بشرح فاطسة من الضحك وبطريقة استفزازية وربي مااعتقد ان غير دعائي صبرني على ضحكها واستهزائها جالسة لحالها وتنظر للسقف وتضحك
واللي قاهرني ان زميلاتها من تصرفها هذا وسكوتي عليها احس ان ثقتهم اهتزت فيني
وانا اريد ان اسألكم يااخواتي انا كل ما تناقشني في موضوع احضر المصدر واوريه لها وللطالبات واقول لهم انا بوريكم المصدر حتى تثقوا بما اعطيه لكم فهل انا غلطت بهذه النقطة ام لا
ارجوكم شوروا علي

والله تعبت حسبي الله ونعم الوكيل عليها

**الوعد الحق2** · 19-03-2011, 03:55 PM

ياقلبي عليك اما تجيبن لهم المصدر وتورينهم عساهم ما صدقوا بنات ال اقولك شكلك انتي ياقلبي طيبة زيادة احقريهم واشرحي درسك ولا تقومين الا اللي ترفع يدها بس وسوي اختبارات مفاجية كل حصة كلام خارجي ممنوع ولا ضحك ولا شي خليك جاده ولا تردين على احد انتي المعلمة وبيدك كل شي البنت هذي احقريها لاخر السنه وخليها دامها عارفة الماده والله قهرتيني نفسي اجي واواريها بنفسي

**The Consellor** · 19-03-2011, 05:20 PM

حبيبتي صدقيني البنت هذي ماينفع معاها التجاهل..
من بكرى ادخلي عليهم بقوة وناظريها على طول بنظرات جدية وطولي شوي بالنظرة وخليها تفهم من نظرتك إنك ناوية لها على شر..و هزي براسك شوي يعني كأنك تتوعدينها..
وخلي الفصل كلهم يخافون ويحسون بقوتك..
بعدين على هدوووووووء تام ابدئي شرحك ولا تتكلمي عربي نهائي كله انجلش وأي تصرف جانبي أو كلام أو ضحك هزئي عليه والبنت هذي بالذات ركزي عليها لو سوت شي وتسلطي عليها ولو قامت تستفزك اطرديها قولي لها هذا مو مكانك أنتِ قومي اطلعي برا..يا أنا يا أنتِ..أنا أرقى من إني أدرس أمثالك..هذا آخر إنذار لك يا تتعدلي وتغيري من نفسك ولا ما أشوفك نهائي بحصتي..
إذا استمريتي على حالك هذا لاتحضري الحصة مرة ثانية..مو أنتِ اللي تستهيني فيني..أنتِ لسا ماعرفتيني للآن..نصيحة احترمي نفسك واعرفي مين اللي قدامك قبل ماتندمي على كل لحظة تصرفتي فيها بغباء..<<اتوقع هالتهديد بيخوفها لأنه يثبت حبك لنفسك وثقتك فيها وإنك ماترضين أحد يدوس على كرامتك..وأنت حيث تضع نفسك صدقيني إذا عكستي لهم حبك لنفسك وحرصك على كرامتك مستحيل يتجرؤا عليك..لكن إذا أنتِ تنازلتِ عن حقوقك وأهميتك واحترامك أكيد راح يهينوك<<حطي الكلام هذا ببالك زين..نفسك أولاً قبل كل شي
<<طبعاً قولي الكلام هذا بجدية وبنبرة حادة شوي وعالية بعدين عطيها نظرة ثانية قوية وارجعي لدرسك بتماسك واشرحي عادي ولا كأن شي صار..لأنها لو شافت إنك تنرفزتي ورفضتِ تشرحين الدرس أو قلتِ إنه مشروح خلاص مثل ماتخطي كثير من المعلمات راح تعتبرها نقطة ضعفك وتستغلها عليك وتتمادى فيها..
أهم شي لاتبدي تشرحي إلا بهدوء تام واحذري تشرحي بإزعاج علميهم بمجرد ما أقف عند الباب كل وحدة فمكانها ولا وحدة تتكلم وكلنا نكون مطلعين المادة..مفهوووووووم!!
وماحد يدخل بعدي..
خليك قوية ولو شفتي إن قوتك هذي أثرت فيهم وحسيتِ خافوا منك استمري على الجدية بس بدون تجريح لأحد ولاتكسري هيبتك ابداً مهما انضبطوا معك..لانهم راح يرجعون مثل ماكانوا..
وأهم شي ركزي على المشاغبة هذي ولاتتجاهلينها خليك صارمة معاها وشددي عليها العقاب ولو حاولت تجاوب وتسوي نفسها فاهمة لا تردي عليها اعتبري ماحد جاوب..ولو قالت أنا جاوبت قولي أنتِ مالك مكان بحصتي مادمتِ بأسلوبك الطفولي..وهكذا..وخلي معاك دفتر الدرجات وكل شي احسبيه بالدرجات..ولاتتسامحي..عشان فعلاً يهابونك..
أتمنى من قلبي تطبقي الكلام هذا وماتتجاهلينها على كل شي لا مو كل شي يفيد فيه التجاهل..
أنتِ طبقيه بكرى وعلميني ايش يصير..والله معاك
والله يوفقك ويكون بعونك..بس سؤال أخير أنتِ بمدرسة أهلية ولا حكومية؟؟

**خماسه** · 19-03-2011, 06:56 PM

اسلوب طالباتك معك يتحدد من اول حصه

حتى تلاحظين انهم ساكتين يبون يشوفون وش نظامكم !! وايش الحد اللي يوقفون عنده 1!

عشان كذا لا تمزحين او ضحكين معهم وخليك جديه وحازمه

وطبعا واثقه من نفسك !! ركزي ع العلكه توقف صاحبتها ! واللي تتكلم قوميها تجاوب !او اساليها سؤال مباشر

طبعا ماراح تجاوب لانها مو معك !! ف افتحي دفتر العلامات ونقصيها وهي تشوف !!

اللي تعلق تعليقات وتستخف دمها ناظريها بنظره وكملي درسك بتتفشل

والبنت اللي تفلسف احقريها وتجاهليها ممكن تقومينها مره في الاسبوع بس وعلى سؤال غبي يعني مايمديها تتفلسف بااجابته

اي تعليقات طنشي !

وخسفي بالدرجات للبنات اللي يقلون ادبهم مو لازم تدخلين معهم بمهاترات !! هم لما يشوفون درجاتهم بيتعدلوون !

اذكر الترم الاول فيه طالبه ترفض تجيب دفتر ورافضه تشارك يعني زي الطاوله لا ونظرات بعد !!

المهم عطيتها بالمشاركه واحد وربع من عشره وبما انه ضعيفه بالورق رسبت

بس لما بدينا الترم الثاني وبديت افتش ع الدرس والواجب !!!! كانت اول وحده تفتح لي دفترها وواجبها محلول

ضحكت بخاطري وقلت الحين بتدرين ان الله حق وتنضبطين لكن لما تتعدل انسي كل اللي فات وابدي معها من جديد

**نورالنار** · 19-03-2011, 07:25 PM

انت قلتي من اول انها درست في امريكا وتمكنت من اللغة الانجليزيه ويمكن حتى الاكسنت عندها غيرر
يعني يمكن تقراء الكتاب كلوو وتفهموو لوحده وتجيب دراجات عاليه
يعني مستوها العلمي فوق مستوى الطالبات ويمكن تصير تتناقش معك في امور انتي ماتعرفيها
البنت وصلت لمرحله من الثقه والتمكن من اللغة لحد الغرور
تستهزء بالدرس وبالكتب وبالاستاذه
اول شي لازم توضحي لها كونها درست بالخارج وتعرف انجليزي مو معنتو تخرب على بقيه الطالبات
قولي لها" كوني تعرفي انجليزي وفاهمه ما يعطيك الحق تخربي على بقية زميلتك"
خليها تحس بالضرر الي هي تسبوو بشكل غير مباشر
قولي لها
" اذا انت وصلتي لهدرجه من العلم والتمكن من الماده لا تحضري عندي الدرس"
"اتفضلي الباب مفتوح"
اطرديه من الفصل وانت اعصابك بارده
واخبري الاداره انو البنت هذي شاطر من الناحيه العلميه
لكن من الناحيه السلوكيه مش موودب
اسمها وزراة التربيه والتعليم
يعني التربيه والادب قبل التعليم والتعلم

وحاولي تخبري الطالبات انو تقسيم درجات تبعك يشمل الانضباط والسلوك

يعني من 10 درجات
درجيتن على واجبات منزليه وصفيه و......
درجيتن على مشاركه من غير فوضى و....
درجيتن على الانشطه الا صفيه من ناحيه المطويات والاذاعه و .....
درجيتن سلوك بالصف من ناحيه الهدوء والاخلاق والتعامل و......
درجيتن على الانضباط من ناحيه احضار الكتاب وعدم التاخر و.....
و10 درجات للاختبار
يعني على اساس التقسيم هذا يمكن تعطيها 5 من اصل عشر درجات وكونها ممتازه رح يوثر فيها هاالشي

انا كان عندي طالب عايش بامريكا من يوم كانو عمرو 8 سنوات
مو بس يتكلم انجيلزي كمان فرنسي
كان محترم
لكنو ملقوف يجاوب بدون استاذن
حل كتاب النشاط من ثاني اسبوع وصار يغشش الطلاب في الواجبات
يقتل الحماس بكثره اجابتوو الصحيحه وحماسوو الزياد
مسكته يوم على جنب و اخبرته انو الانجليزي حقو ممتاز وانه راح ياخذ الدرجه الكامله
بس لازم يعطي زملائه بالفصل فرصه بالاجابه
وصرت استغل موهبته والاكسنت حقه في تقديم الاذاعه الانجليزيه وتسجيل بعض المواضيع
يجيب مواضيع وافكار
باخر الايام صرت اناديه المرجع
اذا مافي احد من الطلاب عرف الاجابه اخليه هو يجاوب
يعني كسبتو بصفي
صار معي مو ضدي

في عندي كم سوال لك
انت تعيين رسمي ولا عقد
كم نصابك
واي مرحله تدرسين

**بيلسآآن** · 20-03-2011, 02:44 AM

شوفي يا اختي .. خلي عنك الطيبه الزايده وخليك واثقه بنفسكـ ,, واذا راددتــك بالكلام قولي لها بالعربي الفصيح (( انطمي ولا كلمه )).. اذا صرتي مدرسه قولي اللي تبين لطالباتكـ ,, ,وتراك غلطتي لما جبتي المصادر لهم عنهم ما صدقو مو لازم انتي المدرسه وانتي اللي كلامها يمشي حتى لو غلط ,,

وانا بصراحه اسلوب اني اعاملها باحترام عشان تستحي وتحترمني احس ما عاد ينفع الحين ,, النصايح اللي عطوك اياها الاساتذه قبلي احسها مرره حلووه نصيحه جربيها ,, تمنيت الحين اني مكانك واوريها شغل الله كيف..