هل أترك التدريس.......

**جود33** · 09-09-2007, 09:28 AM

احسه صعب والله

كل درس تحضير فلاش كاردز وورك شيتز وكويزات و دفتر تحضير وكله طباعة
أمس سالوني عن دفتر التحضير ما بعد طبعت التعاميم ولا شيء
حتى الفلاش كاردز حقت الاسبوع هذا ما سويته

يعني مكلف جدا خاصة واني ماسكة 3 مناهج وقابله للزيادة

وتوقيت موضوعي الحين لاني غبت ما اقدر اروح بدون تحضير

شوركم يا خوان وأخوات

**جمون** · 09-09-2007, 03:12 PM

جود صلي عالنبي

وشدي حيلك!!

**marka** · 09-09-2007, 03:13 PM

على حسب ما فهمت إنك تكتبي فلاش كاردز كثير و إنك ماسكة أكثر من منهج
يا أختي الفلاش كاردز ما هي حل
أكتبي الكلمات ع السبور و نقصي حرف أنطقي الكلمه و خلي طالباتك يحزرو الحرف الناقص ( هذي الطريقة ما تكلف شي )
التحضير حضري في المدرسة بالوقت اللي تكوني فية فاضية
اللله يعينا أجمعين

**ميس** · 09-09-2007, 04:10 PM

جود
توكلي على الله واحسن التوكل
هونيها وتهون

يعني مكلف جدا خاصة واني ماسكة 3 مناهج وقابله للزيادة

كل شي تقدرين تسوينه وبشكل بسيط وحلو
باستخدام بعض الادوات المتوفره
في اي مكتبه
ركزي اهم شي على طريقه الشرح

اما انك تتغيبين
أو تتركين التدريس
فهذا مو حل ابد

اكثري من الدعاء والاستغفار

قلبي عندك
والله يوفقك

**ريــ الغلا ــم** · 09-09-2007, 09:04 PM

ياعمري ترى مريت بهالمرحله

بس الحين الحمد لله عديت

وعالعموم كل شئ صار متوفر الحين ولله الحمد
من تحضير ووسائل

وهالموقع يغنيك بعد الله عن الروحه للمكتبات او الخساره في وسائل مكلفه

اتكلي على الله وقوي ايمانك به سبحانه
فمن تعلق بالله كفاه

وبعدين والله التدريس فله اذا تقبلناه وصرنا ايزي ميزي خخخخخخخخخ

**shy-rose** · 09-09-2007, 10:49 PM

كل شي يا عزيزتي في بدايته صعب .......

و رحلة الالف ميل تبدأ بخطوة ..........

را ح تتعبي في البداية ....... كل المعلمين يمروا بهذه الفترة في البداية ...... بعد كذا ( ممكن بعد سنة ) تصير عندك خبره ....... و تتذكري تعبك في البداية و تضحكي على نفسك

شدي حيلك و توكلي على الله

**pretty fulla** · 09-09-2007, 10:51 PM

جود انا الآن امر بنفس الوضع ثلاثة مناهج منهجين متوسط ومنهج سادس وحاسة مرررررة
بضيقة بس شوفيي صابرة ومحتسبة
واللي زايدني ضيقة اني ماسكة سادس يعني مسؤولية كبييييييرة مرحلة تاسيس وانا حاسة اني ماني
قدها واللي زايدني مسؤولية اكثر واكثر انه الطالبات متحمسين جدا وانا ماني فايقتلهم لكن اعيد واكرر اصبري واحتسبي والله يعيننا ويعينك

**Samaya** · 10-09-2007, 04:24 AM

لاااا تتركي التدريس

هذا شئ طبيعي والخوف والقلق والتوتر ان شاء الله مع مرور الوقت راح يزول

وراح تحسي بمتعة التدريس

ههههه ههههه ههههه

انا قعدت شهر لاعندي لا تحضير ولا حتى دفتر الدرجات ولا اعرف وشلون ارصد الدرجات
بس الحياة مدرسه

والله يوفقك لما يحب ويرضي

**جود33** · 10-09-2007, 10:20 AM

جمون

شاكرة مرورك

الله يعين

marka

ما استعمله ابد الا في النيو فوكاب
حتى الكويزات و الصفحات الاولى من دفتر التحضير محتاجة طباعة و لا كيف

موفق

ميس

أنا حسبته بكل الطرق ما لقيت أقل تكلفة الا الفلاش كاردز و هذي تبي له طباعة

مو معقول كل درس أروح لخدمات طالب خاصة ان حينا جديد فلازم أطلع لاحياء ابعد

الله يعين الجميع

ريــ الغلا ــم

عارفة هالموقع من ايام التطبيق

لكن التدريس غير

لو حضرتي لي مشرفة ؟!!
مو معقوله طول الحصةاشرح من كتابي والبنات منزلين عيونهم لكتبهم بيصير مثل درس الريدنق ممل.

مشكور ع المرور

shy-rose

ما احب البدايات الفاشلة راح تاثر علي طول الترم وتعطي الطالبات انطباع عني مو كويس
خاصة انو يوم السبت قالوا لي استاذة فلانه كانت تعطينا كويز كل بعد يونت وورك شينز نحطه بملف والنيو فوكاب تشرحه بكذا و كذا
نذكرت الطباعة وضاق صدري من أولها كذا أنا ما زينت الاهداف ولا التقسيم حق المنهج

البداية صعبة من الناحية النفسية وترتيب أمورك أما صعوبة في تحضير الدرس و وسائلة بيعطي الادارة انطباع عني مو كويس

pretty fulla

هذا طبيعي انك تخاف من ان مستوى ادائك ما يرضيك

لكن انك تحسين انك ما تقدرين تبدين صح وبالشكل اللي رسمتيه لنفسك وتوقعه منك طالباتك

الحقيقة اول مرة اندم على تخصصي انجلش لو مختارة قسم آخر

Samaya

مو توتر لاني عارفة ان التوتر بيروح

الله يعين الجميع

لو اتصلتوا اليوم علي راح اشرح له ظروفي اذا بغوني الترم الثاني كان بها
حاليا راح احول اهتمامي للتقديم ع الماستر

دعواتي لكل من مر من هنا

**شمريه نمبر ون** · 12-09-2007, 05:16 PM

ماله داعي كل هذا
ليش كل درس وورك شيت وكويزات ومدري ايش
يا بنتي هونيها وتهون انتي مطالبة بتوصيل المعلومة للطالبات ولو بدون شي نهائي ومو لازم طباعة وكلافة اللي تقدرين عليه سويه لا يكلف الله نفسا إلا وسعها

**حمامة** · 12-09-2007, 06:43 PM

جود

أختك عندها أربع مناهج .... وقابل للزيادة من منهج سادس

عليك بالصبر ثم الصبر ثم الصبر ومن صبر لا بد يحمد في الأخير

استغفري بك كثيراً ... وسترين النتيجة ...

**شاكيرا** · 12-09-2007, 06:54 PM

شوفي ياقلبي شكلك توك نيو تيتشر

والله يانا مريت فيها العام

حتى اني في الاسبوع الثاني بالطريق للبيت اصيح بالسياره

شوفي يالغلا نصيحه لوجه الله عندك 3 مناهج اقعدي لك ساعتين على الكمبوتر وامسكي وحده كامله لصف اول مثلا واطبعي كل الفلاش كارد وبلاش تودينها مكتبه اطبعيها وقصقصيها ولزقيها على ورق مقوى ملون تطلع اطلقها فلاش كارد

اكتبي الكويز واطبعيه
سوي الوورك شيت واطبعيها وحطيهم بملف وشيليهم لدرجك في المدرسه والتحضير استغلي كل حصة فراغ وحضري صدقيني مابترتاحين الا كذا
حضري وجهزي وحده كامله

وعموما ترا اول سنه هي الصعبه والا بعدين تهون
والله يوفقنا وياك

**نور** · 15-09-2007, 08:05 AM

استعيني بالله
يا عزيزتي اي شي ببدايته صعب
بالنسبه للفلاش كاردز جيبي قطع فلين ملون وغلفيه بتجليد شفاف وكل يوم اكتبي عليه الكلمات اللي تبين بيدك بدون طباعه في اي حصه فاضيه واليوم الثاني امسحي الكلمات واكتبي غيرها انا كنت لما احس نفسي مشغوله اوزع الكلمات على الطالبات كنشاط لهم يعني اقول فلانه وفلانه اكتبو لي الكلمات بخطكم وتعالي شوفي انواع الابداع اللي يبدعونه ومو بس الكلمات مثلا بدرس الشاي خليت وحده تجيب غلايه ووحده سكر وثالثه شاي بانواعه ورابعه نعناع وخامسه اكواب وخليتهم يحسو بمشاركتهم في الدرس وشربنا شاي ولا احلى
بالنسبه لاوراق العمل ريحي بالك واطبعي لهم مذكره يكون فيها كل اوراق العمل انا جمعت اوراق عمل جدا رائعه من هالموقع المميز واضفت لها وطبعتها لهم كمذكره يشتروها من المكتبه وماشيين زي اللوز
انا وصل فيني الاحباط لدرجه كنت اروح لطبيب نفسي وكان كله كلام فارغ عارفه ايش كان يقول لي كان يقول لي كل يوم قولي لنفسك انا قدها وقدود واي شي صعب يواجهك اقنعي نفسك انك تقدري عليه ولا شعوريا يتركز في العقل الباطن وتلاقي نفسك ولا احلى والاهم من هذا كله استعيني بالله وبالدعاء
شكلي خليتها فلم عربي لكن والله تعاطفت معك
الله يفرج همك